“அறம் சார்ந்த என் அரசியல் வாழ்க்கையை உங்கள் மகனுக்காக அழிக்க ‘துரோகம்’ என்ற வார்த்தையையே நீங்கள் தேர்ந்தெடுத்தீர்களா?” — மதிமுக பொதுச் செயலாளர் வைகோ வெளியிட்ட கருத்தைத் தொடர்ந்து, அந்தக் கட்சியின் துணை பொதுச் செயலாளர் மல்லை சத்யா வெளியிட்ட சமூக ஊடகப் பதிவு கட்சியினரிடையே பரபரப்பை ஏற்படுத்தியுள்ளது.

முன்னதாக ஒரு பேட்டியில் வைகோ கூறியதாவது:

“மிக்க காலமாக, கட்சியின் நிகழ்ச்சிகளில் பங்கேற்கும்போது, மல்லை சத்யா எப்போதும் மனஅழுத்தமுடன், உருக்கமான முகபாவனையோடு இருப்பதை கவனிக்கிறேன். வெளிநாட்டு பயணங்களில், அவர் தன்னை மதிமுகவின் உறுப்பினராக அல்லாமல், மாமல்லபுரம் தமிழ்ச்சங்கத் தலைவராகவே அறிமுகப்படுத்துகிறார். பிரபாகரனிடம் மாத்தையா செய்தது போல், எனக்கு மல்லை சத்யா துரோகம் செய்துள்ளார்” என்றார்.

இந்தக் கருத்து மதிமுக வட்டாரத்தில் பரபரப்பை ஏற்படுத்த, மல்லை சத்யா தனது சமூக ஊடக பக்கத்தில் பதிலளித்துள்ளார். அவர் கூறியதாவது:

“மதிமுகவின் செயல்பாடுகளில் தொடர்ந்து ஈடுபட்டு வரவேண்டும் என்ற எண்ணத்துடன் தான் இன்றுவரை கட்சியில் இருந்தேன். ஆனால் தற்போது உருவான விசித்திரமான சூழ்நிலைக்குத் நான் காரணமில்லை.

பிரபாகரனுக்குத் துரோகம் செய்த புலி மாத்தையாவுடன் என்னை ஒப்பிட்டு பேசப்பட்டதே மிகுந்த வேதனையை ஏற்படுத்துகிறது. என் தலைவரான வைகோவுக்கு எதிராக நான் செயல் பட்டு இருக்கிறேன் என்பதே உண்மையானால், அரசியலில் உண்மை வாழ்கின்றவர்கள் சொல்லும் ‘அறமே கூற்றாக வந்து என்னை அழிக்கட்டும்’ என்ற நீதியை ஏற்க தயார்.

32 ஆண்டுகளாக, நாள் இரவாகாது கட்சிக்காக உழைத்த என்னிடம், தன் மகன் துரை வைகோவின் அரசியல் இலக்கிற்காக ‘துரோகி’ என்ற குற்றச்சாட்டை சுமத்திய அந்த நாளிலிருந்து என் கண்களில் தூக்கமே இல்லாமல் போனது. என் அரசியல் வாழ்க்கையை வீழ்த்தவேண்டும் என்ற எண்ணமிருந்தால், வேறு ஏதாவது குற்றத்தை கூறி இருக்கலாமே. அல்லது ஒரு விஷ பாட்டிலை கையில் கொடுத்து, குடிக்கச் சொல்லியிருந்தால் குடித்து இறந்து விட்டிருப்பேன்.

அறத்தின் அடிப்படையில் அமைந்த என் அரசியல் வாழ்க்கையை முடிவுக்கு கொண்டு வர ‘துரோகம்’ என்ற வார்த்தையைத் தேர்ந்தெடுத்ததா?’’ என சோர்ந்த மனத்துடன் குறிப்பிட்டுள்ளார்.

மேலும், இந்த விவகாரம் குறித்து ஒரு தனியார் தொலைக்காட்சிக்கு பேட்டியளித்த மல்லை சத்யா கூறியதாவது:

“உலகமே என்னை விலக்கினாலும், வைகோ மட்டும் என்னை விலக்க மாட்டார் என்று நம்பிக்கையோடு இருந்தேன். ஆனால் என் அரசியல் வாழ்வை முடக்க ‘துரோகி’ என்ற சொல்லால் என்னை அழித்துவிட்டார். அது என் மீது அழிக்க முடியாத ஒரு கருப்புப் புள்ளியை பதித்துவிட்டது” என்றார். அந்த நேரத்தில் அவர் கண்களில் நீர் தெரிந்தது.