மடப்புரம் அஜித் குமார் வழக்கில் கைதான போலீசாரை விசாரணைக்காக காவலில் எடுக்க சிபிஐ மனு: நீதிமன்றத்தில் தாக்கல்
சிவகங்கை மாவட்டம் மடப்புரத்தில் நடந்த கோயில் காவலாளர் அஜித் குமார் கொலை வழக்கில், கைது செய்யப்பட்ட 5 தனிப்படை காவலர்களை சிபிஐ காவலில் எடுத்து விசாரிக்க அனுமதி கோரி, சிபிஐ தரப்பில் மதுரை நீதிமன்றத்தில் மனு தாக்கல் செய்துள்ளது.
வழக்கின் பின்னணி:
மடப்புரம் பகுதியில் கோயில் காவலாளராக பணியாற்றி வந்த அஜித் குமார், போலீசாரின் தாக்குதலுக்கு உள்ளாகி உயிரிழந்தார். இதைத் தொடர்ந்து, தனிப்படை போலீசாரான பிரபு, கண்ணன், சங்கர் மணிகண்டன், ராஜா மற்றும் ஆனந்த் ஆகிய 5 பேரும் கைது செய்யப்பட்டு, தற்போது மதுரை மத்திய சிறையில் அடைக்கப்பட்டுள்ளனர்.
இந்த மரணம் தொடர்பான வழக்கு மற்றும் அஜித் குமார் மீது முன்பு பதிவு செய்யப்பட்ட திருட்டு வழக்கு ஆகிய இரண்டும் தற்போது சிபிஐயிடம் மாற்றப்பட்டு விசாரணை நடைபெற்று வருகிறது. மேலும், வழக்குகள் திருப்புவனம் நீதிமன்றத்திலிருந்து, மதுரை தலைமை குற்றவியல் நடுவர் நீதிமன்றத்திற்கு மாற்றப்பட்டுள்ளன.
நீதிமன்றத்தில் தொடர்ந்த நிகழ்வுகள்:
முன்னதாக, குறித்த 5 போலீசாரும் நீதிமன்றத்தில் ஆஜர்படுத்தப்பட்ட நிலையில், அவர்களின் நீதிமன்ற காவல் ஆகஸ்ட் 13-ம் தேதி வரை நீட்டிக்கப்பட்டது.
இந்த நிலையில், அஜித் குமார் கொலை வழக்கில் முக்கிய தகவல்களை பெறும் நோக்கில், கைதான 5 தனிப்படை போலீசாரையும் சிபிஐ காவலில் எடுத்து நேரில் விசாரணை நடத்த வேண்டும் என முடிவு செய்த சிபிஐ, இதற்கான அனுமதியை பெறும் வகையில் மனுவை நீதிமன்றத்தில் தாக்கல் செய்துள்ளது.
இந்த மனு ஆகஸ்ட் 5-ம் தேதி விசாரணைக்கு வரவுள்ளது என தகவல்கள் தெரிவிக்கின்றன.
