மூத்தவர்கள் மற்றும் மாற்றுத் திறனாளிகளுக்காக ரேஷன் பொருட்கள் வீடு தேடிச் செல்லும் திட்டம்: ஆகஸ்ட் 12 முதல் தொடக்கம்
தமிழகத்தில் வாழும் முதியோர் மற்றும் மாற்றுத் திறனாளி குடும்ப அட்டைதாரர்களுக்கு, அரிசி மற்றும் சர்க்கரை போன்ற நியாயவிலைக் கடை பொருட்களை நேரடியாக வீடுகளுக்கு சென்று வழங்கும் “முதல்வரின் தாயுமானவர்” திட்டத்தை முதலமைச்சர் மு.க. ஸ்டாலின் வரும் ஆகஸ்ட் 12-ஆம் தேதி சென்னையில் தொடங்கிவைக்க உள்ளார்.
இது தொடர்பாக அரசு வெளியிட்ட செய்திக் குறிப்பு வருமாறு:
மக்களுக்கு தேவையான அரசுசார்ந்த சேவைகள் நேரடியாக வீட்டில் கிடைக்கச் செய்யும் அரசின் நோக்கத்தின் தொடர்ச்சியாக, மூப்புக்காரணமாகவோ அல்லது மாற்றுத் திறனாளி நிலை காரணமாகவோ ரேஷன் கடைக்கு நேரில் வர முடியாதவர்களின் நலனை கருத்தில் கொண்டு, அவர்களது இல்லத்திற்கே நியாயவிலைக் கடை பொருட்களை கொண்டு சேர்க்கும் திட்டம் அறிமுகமாகிறது.
இந்த திட்டம் முதற்கட்டமாக 34,809 நியாய விலைக் கடைகளின் வாயிலாக செயல்படுத்தப்படுகிறது. இதில், 70 வயதை கடந்த மூத்த குடிமக்கள் உள்ள 15,81,364 குடும்ப அட்டைகளில் உள்ள 20,42,657 பயனாளர்களும், மேலும் 91,969 குடும்ப அட்டைகளில் உள்ள 1,27,797 மாற்றுத் திறனாளிகளும் சேர்த்து, மொத்தம் 16,73,333 குடும்பங்களுக்கு உட்பட்ட 21,70,454 பயனாளர்களுக்காக வீடு தேடி ரேஷன் விநியோகிக்கப்படும்.
இந்த சேவை ஒவ்வொரு மாதமும் இரண்டாவது சனிக்கிழமையும் ஞாயிற்றுக்கிழமையிலும் நடை பெறும். தகுதியுள்ள குடும்பங்களை அடையாளம் காண உணவுப் பொருள் வழங்கல் மற்றும் நுகர்வோர் பாதுகாப்புத் துறை தரவுகளை சேகரித்து, புறநகர் மற்றும் மாவட்ட அலுவலர்களிடம் அனுப்பியுள்ளது.
மின்னணு தராசு, விற்பனை கணினி உள்ளிட்ட வசதிகள் கொண்ட மூடிய வாகனங்கள் மூலமாக, நியாயவிலைக் கடை விற்பனையாளர்கள் பாதுகாப்புடன் அந்தந்த பயனாளர்களின் இல்லங்களுக்கு சென்று பொருட்களை வழங்குவார்கள்.
இத்திட்டம் செயல்படுத்த ரூ.30.16 கோடி செலவாகும் என அரசின் மதிப்பீடு. இது, சமூகத்தில் அக்கறை தேவைப்படும் பிரிவினரின் வாழ்க்கையை மேம்படுத்தி, அவர்களின் உணவுப் பாதுகாப்பை உறுதிசெய்யும் முக்கிய முயற்சி என அரசு கூறியுள்ளது.
சென்னையில் முதல்வர் இத்திட்டத்தை துவக்கும் விழாவில், மற்ற மாவட்டங்களில் அமைச்சர்கள், நாடாளுமன்ற உறுப்பினர்கள், சட்டப்பேரவை உறுப்பினர்கள் மற்றும் பிற மக்கள் பிரதிநிதிகள் பங்கேற்க இருப்பதாகவும் அறிவிக்கப்பட்டுள்ளது.
