பெரியபாளையம் சுற்றுவட்டாரத்தில் கடந்த 5 ஆண்டுகளாக அறிவிக்கப்படாத மின்வெட்டு காரணமாக பொதுமக்கள் மற்றும் விவசாயிகள் கடும் அவதியுறுகிறார்கள். பெருகி வரும் குடியிருப்புகள், வணிக மற்றும் தொழில் நிறுவனங்களுக்கான மின் தேவையை முழுமையாக பூர்த்தி செய்ய முடியாமல், பெரியபாளையம் துணை மின் நிலையத்தில் இருந்து வழங்கப்படும் மின்சாரம் போதுமானதல்ல. இதனால், கொரட்டூர், வெங்கல், செம்பேடு, பாகல்மேடு, அத்தங்கிகாவனூர், அழிஞ்சிவாக்கம் உள்ளிட்ட 40 கி.மீ. பரப்பளவில் உள்ள சுமார் 40 கிராம பகுதிகளில் அடிக்கடி மின்வெட்டு ஏற்பட்டு வருகிறது.
கோடைகாலங்களில் தினசரி 5 முறைக்கும் மேலாக, மற்ற காலங்களில் 2-3 முறை அறிவிக்கப்படாத மின்வெட்டுக்கள் மற்றும் குறைந்த அழுத்த மின்சாரம் விநியோகிக்கப்படுவதால் முதியவர்கள், குழந்தைகள், மாணவர்கள், விவசாயிகள் பல்வேறு சிரமங்களை சந்திக்கின்றனர். மேலும், 40 ஆண்டுகளுக்கு முன்பு போடப்பட்ட பழைய மின் கம்பங்கள் மற்றும் போதிய ஊழியர்களின் பற்றாக்குறையால் மின் பாதை பழுதுகள் உடனடியாக சரிசெய்யப்படாததால் மின்சார விநியோகம் தாமதமாக்கப்படுகின்றது.
இதனால், வெங்கல் ஊராட்சியில் புதிய துணை மின் நிலையம் அமைக்க வேண்டும் என்ற கோரிக்கை பொதுமக்கள், விவசாயிகள் மற்றும் மின் வாரிய அதிகாரிகள் வழியாக தொடர்ந்து அரசுக்கு வைக்கப்பட்டாலும், வருவாய்த் துறை போதிய இடம் ஒதுக்கவில்லை என்பதால் இந்த துணை மின் நிலையம் இன்னும் அமைக்கப்படவில்லை.
இதனை முறையாக தணிக்கை செய்து, மின்சாரம் வழங்கும் வசதிகளை மேம்படுத்துவதற்கும், புதிய துணை மின் நிலையம் அமைப்பதற்கும் மின் வாரிய அதிகாரிகள் மற்றும் வருவாய்த் துறை உடனடியாக நடவடிக்கை எடுக்க வேண்டுமென அவர்கள் கோரிக்கை விடுத்துள்ளனர்.
