எய்ட்ஸ் தொற்றுள்ள பெற்றோரின் குழந்தைகளுக்கு கல்வி உதவித் தொகை: புதுவை முதல்வர் அறிவிப்பு
எய்ட்ஸ் தொற்றால் பாதிக்கப்பட்ட பெற்றோரின் பள்ளி மாணவர்களுக்கு ரூ.5,000 மற்றும் கல்லூரி மாணவர்களுக்கு ரூ.12,000 கல்வி உதவித் தொகை வழங்கப்படும் என்று புதுச்சேரி முதல்வர் ரங்கசாமி தெரிவித்தார். மேலும், எய்ட்ஸ் பாதித்தோரின் மருத்துவ பயணச் செலவு ரூ.1,000 ஆக உயர்த்தப்படவுள்ளதாகவும் கூறினார்.
நாடு முழுவதும் இளைஞர்களுக்கு எச்.ஐ.வி-எய்ட்ஸ் மற்றும் பாலியல் நோய்கள் பற்றிய விழிப்புணர்வு நிகழ்ச்சிகள், சர்வதேச இளைஞர் தினத்தை முன்னிட்டு அனைத்து மாநிலங்களிலும் நடைபெற்றன. புதுச்சேரியில், எய்ட்ஸ் கட்டுப்பாட்டு சங்கத்தின் சார்பில் கம்பன் கலையரங்கில் இரண்டு மாத எச்ஐவி-எய்ட்ஸ் தீவிர விழிப்புணர்வு பிரச்சாரத் தொடக்க விழா நடைபெற்றது.
அதில் முதல்வர் ரங்கசாமி, மாணவர்களுக்கு எய்ட்ஸ் தொடர்பான விழிப்புணர்வு தேவையுள்ளதாகவும், தீய பழக்கங்களிலிருந்து தவிர்க்க வேண்டும் என்றும், வாழ்க்கை நலமாக இருக்க சுய ஒழுக்கம் முக்கியம் எனக் கூறினார். இந்தியாவில் எய்ட்ஸ் பாதிப்பு சதவீதம் 0.20 என்ற நிலையில், புதுச்சேரியில் 0.18 சதவீதமாக குறைவாக உள்ளது எனக் குறிப்பிட்டார்.
எய்ட்ஸ் தொற்றுள்ளோருக்கு சத்தான உணவு வழங்க ரூ.1,250 மதிப்புள்ள சத்துணவு பெட்டகம் வழங்கப்படும். எய்ட்ஸ் நோயால் உயிரிழந்தோரின் குடும்பங்களுக்கு இறுதிச் சடங்கு உதவியாக ரூ.15,000 வழங்கப்படும். இந்த அனைத்து திட்டங்களும் விரைவில் அமல்படுத்தப்படும் என்றும் முதல்வர் தெரிவித்தார்.
