வங்கக் கடலில் காற்றழுத்த தாழ்வுப் பகுதி: திருவள்ளூர், ராணிப்பேட்டை, நீலகிரியில் இன்று கனமழை
திருவள்ளூர், ராணிப்பேட்டை மற்றும் நீலகிரி மாவட்டங்களில் இன்று கனமழைக்கு வாய்ப்பு இருப்பதாக வானிலை ஆய்வு மையம் தெரிவித்துள்ளது.
சென்னை மண்டல வானிலை ஆய்வு மையத்தின் செய்திக்குறிப்பின்படி, மத்திய வங்கக் கடல் பகுதிகளில் ஒரு வளிமண்டல மேலடுக்கு சுழற்சி நிலவுகிறது. இன்று மத்திய மேற்கு மற்றும் அதனோடு இணைந்த வடமேற்கு வங்கக் கடல் பகுதிகளில் காற்றழுத்த தாழ்வுப் பகுதி உருவாகும் வாய்ப்பு உள்ளது. மேலும், இந்த காற்றழுத்த தாழ்வு தொடர்ந்து 48 மணி நேரத்தில் வலுவடைய வாய்ப்பு உள்ளது.
தென்னிந்திய பகுதியில் உள்ள வளிமண்டல மேலடுக்கு சுழற்சிகளின் தாக்கம் காரணமாக, வட தமிழகத்தின் சில பகுதிகளில், தென் தமிழகத்தில் சில இடங்களில், புதுச்சேரி மற்றும் காரைக்கால் பகுதிகளிலும் இன்று மிதமானது முதல் லேசான மழை, மற்றும் இடி மின்னலுடன் கூடிய மழை பெய்ய வாய்ப்பு உள்ளது. குறிப்பாக, திருவள்ளூர், ராணிப்பேட்டை மற்றும் நீலகிரி மாவட்டங்களில் சில இடங்களில் கனமழை பெய்ய வாய்ப்பு காணப்படுகிறது.
சென்னை மற்றும் அதன்வட்டார பகுதிகளில் இன்று வானம் பொதுவாக மேகமூட்டத்துடன் காணப்படும். நகரின் சில பகுதிகளில் இடி மின்னலுடன் கூடிய, லேசானது அல்லது மிதமான மழை பெய்யும் வாய்ப்பு உள்ளது.
அதிகபட்ச வெப்பநிலை பாரன்ஹீட்டில் 93.2°F, குறைந்தபட்சம் 77°F – 78.8°F வரையிலாக இருக்கும்.
தென்தமிழகம் கடலோர பகுதிகள், மன்னார் வளைகுடா, குமரிக்கடல், தெற்கு மற்றும் மத்திய வங்கக் கடல் பகுதிகள், அந்தமான் கடல் மற்றும் ஆந்திரா-ஒடிஸா கடலோரங்களில் இன்று அதிகபட்சமாக மணிக்கு 65 கி.மீ வேகத்தில் பலத்த காற்று வீச வாய்ப்பு உள்ளது. ஆகையால், மீனவர்கள் கடலுக்கு செல்ல வேண்டாம் என வானிலை ஆய்வு மையம் எச்சரித்துள்ளது.
