“இல்லாததை பொல்லாதது போலச் சொல்லி பயத்தை உருவாக்குகிறார் ஆளுநர்” – முதல்வர் ஸ்டாலின்
“ஆளுநர் ஆர்.என்.ரவி, உண்மையற்ற விஷயங்களைப் பொய்யாகக் கூறி மக்களிடையே அச்சத்தை ஏற்படுத்துகிறார். அவர் செய்வது அதுதான்” என்று தமிழக முதலமைச்சர் மு.க.ஸ்டாலின் குறிப்பிட்டார்.
தருமபுரியில் இன்று நடைபெற்ற அரசு நிகழ்ச்சியில், நிறைவடைந்த திட்டங்களை திறந்து வைத்து, புதிய பணிகளுக்கு அடிக்கல் நாட்டியும், நலத்திட்ட உதவிகளை வழங்கியும் பேசுகையில் அவர் கூறியதாவது:
“வரலாற்று சிறப்பும் இயற்கை அழகும் கொண்ட ஒகேனக்கல் இருக்கும் இந்த தருமபுரியில், ₹362.77 கோடி மதிப்பிலான 1,073 திட்டங்களை திறந்து வைத்தேன். மேலும், ₹512.52 கோடி மதிப்பிலான 1,044 புதிய திட்டங்களுக்கு அடிக்கல் நாட்டினேன். ₹830.06 கோடி மதிப்பில், 70,427 பேருக்கு நலனுதவிகளையும் வழங்கி உங்களை சந்திப்பதில் மகிழ்ச்சி அடைகிறேன்.
இந்த நிகழ்ச்சிக்கு வருவதற்கு முன், இந்தியாவில் முதல்முறையாக விவசாயப் பெருங்குடியினருக்கான முக்கியமான திட்டத்தை தொடங்கி வைத்துவிட்டேன். இப்போதுவரை, விவசாயிகள் பயிர்க்கடனுக்கு கூட்டுறவு வங்கிகளில் நேரில் சென்று விண்ணப்பித்து, ஒரு வாரம் காத்திருந்து தான் கடன் பெற்றனர். இப்போது அதனை மாற்றி, வீட்டிலிருந்தபடியே ஆன்லைனில் விண்ணப்பித்தால், அதே நாளில் கடன் நேரடியாக வங்கிக் கணக்கில் சேரும் முறையைத் தொடங்கி வைத்தேன்.”
அடுத்து சில புதிய அறிவிப்புகளை வெளியிட்டார்:
- சித்தேரி பகுதியிலுள்ள 63 பழங்குடி கிராமங்களும், அருகிலுள்ள சில கிராமங்களும், பாப்பிரெட்டிபட்டி வட்டாட்சியரகம் மிகவும் தூரம் என்பதால், இனி அரூர் வருவாய் வட்டத்தில் இணைக்கப்படும்.
- தருமபுரி–பென்னாகரம் இடையிலான 25 கி.மீ. சாலை ₹165 கோடி செலவில் நான்கு வழித்தடமாக மேம்படுத்தப்படும்.
- நல்லம்பள்ளியில் பரிகம்–மலையூர் வனச்சாலை ₹10 கோடியில் தார்ச் சாலையாக மேம்படுத்தப்படும்; மேலும் அரசு மகளிர் மேல்நிலைப்பள்ளிக்கு ₹7.5 கோடியில் புதிய கட்டடங்கள்.
- தருமபுரி புளி உற்பத்தியாளர்களுக்காக ₹11.30 கோடியில் ஒருங்கிணைந்த வணிக மையம்.
- அரூர் நகராட்சியில் ₹15 கோடி செலவில் குடிநீர் திட்ட மேம்பாடு.
“திராவிட மாடல் ஆட்சியாக நாங்கள் ஒவ்வொரு வாக்குறுதியையும் நிறைவேற்றிக் கொண்டு வருகிறோம். சொன்னதைச் செய்வோம், செய்வதைச் சொல்வோம் என்ற தலைவர் கருணாநிதியின் பாதையில் நாங்கள் உழைக்கிறோம்.
2021 தேர்தலுக்கு முன் அறிவித்த ‘விடியல் பயணம் திட்டம்’ குறித்து எதிரிகள் ‘இது சாத்தியமில்லை, பேருந்துகள் குறைக்கப்படும், கட்டணம் அதிகரிக்கும்’ என்று கதைகள் சொன்னார்கள். ஆனால் நிதி சிக்கல்களைக் கடந்து, ஆட்சிப் பொறுப்பு ஏற்ற அன்றே கையெழுத்திட்டது என்னுடைய கையே. இந்தத் திட்டத்தை பெண்களுக்கான சேமிப்பாகவும், முன்னேற்றத்திற்கான முதலீடாகவும் கருதியோம். இப்போது ஒவ்வொரு பெண்ணும் 51 மாதங்களில் சுமார் ₹50,000 சேமித்து விட்டார்கள். இன்று கர்நாடகா, ஆந்திராவிலும் இந்தத் திட்டம் நடைமுறைக்கு வந்துள்ளது.
இதனைத் தாங்கிக் கொள்ள முடியாமல், எதிர்க்கட்சிகளும், அதைவிட மலிவான அரசியல் செய்கிறவர் – நம்முடைய ஆளுநர். அவர் என்ன செய்கிறார்? திமுக மீது அவதூறு பரப்புவார், திராவிடத்தைத் திட்டுவார், சட்டங்களுக்கு ஒப்புதல் தரமாட்டார், தமிழ்த்தாய் வாழ்த்தை அவமதிப்பார், மாணவர்களை இழிவுபடுத்துவார், கல்வி–சட்டம்–பெண்கள் பாதுகாப்பு குறித்து உண்மையற்றதாகக் கூறி பயத்தை கிளப்புவார். இதைத் தவிர வேறேதும் செய்கிறதில்லை!
ஆனால் பாஜக அரசு வெளியிட்ட புள்ளிவிவரங்களே, தமிழ்நாடு நாட்டின் தலைசிறந்த மாநிலம் என்பதைச் சாட்சியமாகக் காட்டுகின்றன. முதலீடு, கல்வி, பெண்கள் பாதுகாப்பு உள்ளிட்ட துறைகளில் நம்முடைய முன்னேற்றம் அவர்களுக்கு பொறாமையை ஏற்படுத்துகிறது. பெண்களுக்கு எதிரான குற்றங்களில் முதலிடத்தில் இருப்பது பாஜக ஆளும் உத்தரப் பிரதேசம்தான் – அதனால், ஆளுநர் அங்கு போய் பேச வேண்டும், தமிழ்நாட்டில் அல்ல.
ஆளுநரின் பேச்சுகள், நம்மிடையே உள்ள மொழி–இன உணர்வுகளை இன்னும் வலுப்படுத்துகின்றன. அதனால் அவர் இங்கேதான் இருக்க வேண்டும் என்று நான் சொல்லி வருகிறேன். அவர் பேசட்டும் – எனக்கு கவலையில்லை. என் நோக்கம் மக்களின் நலன் மட்டுமே.
கடந்த இரண்டு வாரங்களில் மூன்று முக்கிய திட்டங்களைத் தொடங்கியுள்ளேன் – ‘உங்களுடன் ஸ்டாலின்’, ‘நலம் காக்கும் ஸ்டாலின்’, ‘தாயுமானவர்’. இதுவரை நூற்றுக்கணக்கான முகாம்கள் மூலம் ஆயிரக்கணக்கானோர் பயனடைந்துள்ளனர். முதியோர்களுக்கு ரேஷன் பொருட்கள் வீட்டிற்கே சென்றடைகின்றன. அவர்களின் மகிழ்ச்சியான முகபாவனைகளையே நான் உண்மையான வெற்றியாக கருதுகிறேன்.
அடுத்து அமையப்போவது மீண்டும் திராவிட மாடல் ஆட்சி தான் – அதுவே தமிழ்நாட்டை இந்தியாவின் முன்னோடி மாநிலமாக உயர்த்தும்” என முதல்வர் ஸ்டாலின் உரையாற்றினார்.
