“இந்திய கம்யூனிஸ்ட் கட்சி யாரிடமும் எப்போதும் தலைகுனியாது” – சேலம் மாநாட்டில் முத்தரசன் உரை
“இந்திய கம்யூனிஸ்ட் கட்சி எக்காலத்திலும் யாரிடமும் அடிபணியாது என்பதை முன்னாள் முதல்வர் பழனிசாமி தெளிவாக அறிந்து கொள்ள வேண்டும்” என மாநில செயலாளர் முத்தரசன் வலியுறுத்தினார்.
சேலம் நேரு கலையரங்கில் கடந்த நான்கு நாட்களாக இந்திய கம்யூனிஸ்ட் கட்சியின் 26வது மாநில மாநாடு நடைபெற்றது. நிறைவு நாளில் பெரியார் வளைவில் இருந்து செம்படை பேரணி தொடங்கி, போஸ் மைதானத்தில் நிறைவுற்றது. பின்னர் 101 பேர் கொண்ட புதிய மாநிலக் குழு உறுப்பினர்கள் தேர்ந்தெடுக்கப்பட்டனர்.
மாநாட்டில் பேசிய முத்தரசன், “ஒடுக்கப்பட்ட மக்களுக்காக எப்போதும் போராடி வந்தது கம்யூனிஸ்ட் கட்சி. ஆனால் முன்னாள் முதல்வர் பழனிசாமி, ‘இந்திய கம்யூனிஸ்ட் கட்சி அழிந்து விட்டது, தேய்ந்து விட்டது’ என பேசியுள்ளார். அதிமுகவுக்கு எதிராகவும், பாஜகவுக்கு எதிராகவும் வரவிருக்கும் தேர்தலில் கடுமையாக போராடுவோம். அதிமுகவுடன் கூட்டணி இல்லை என்று சொன்னவுடன், திமுகவிடம் பணம் வாங்கி அவர்களுக்கு அடிபணிந்துவிட்டதாக பழனிசாமி குற்றம் சாட்டினார். ஆனால், கம்யூனிஸ்ட் கட்சி எக்காலத்திலும் யாருக்கும் அடிபணியாது என்பதை அவர் உணர வேண்டும்” என்றார்.
தேசிய பொதுச் செயலாளர் டி.ராஜா உரையாற்றுகையில், “இந்தியாவில் கம்யூனிஸ்ட் கட்சி தோன்றிய அதே ஆண்டில் ஆர்எஸ்எஸ் தொடங்கியது. ஆனால் சுதந்திரப் போராட்டத்தில் ஆர்எஸ்எஸ் ஈடுபட்டதாகக் கூறினால், முன்னாள் பிரதமர் வாஜ்பாய், சாவர்க்கர் ஆகியோரையே மட்டுமே சுட்டிக்காட்ட முடியும். கம்யூனிஸ்ட் கட்சி சாதிய வேறுபாடுகளை ஒழித்து, சோசலிச நாடு உருவாக்கும் இலக்குடன் செயல்பட்டது. இதற்காக ஆங்கிலேய அரசு தோழர்களை சதிவழக்கில் சிக்கவைத்து, சிறையில் அடைத்து, கொடுமைப்படுத்தியது. ஆனால் பாஜக, ஆர்எஸ்எஸ் மத அடிப்படையிலான கொள்கையால் மக்களை பிளவுபடுத்தி வருகின்றன” என்றார்.
அவர் மேலும், “வரும் சட்டமன்றத் தேர்தலில் மதச்சார்பற்ற சக்திகள் ஒன்று சேர்ந்து பாஜக, ஆர்எஸ்எஸை அரசியல் மேடையில் தோற்கடிக்க வேண்டும்” என்று வலியுறுத்தினார்.
மாநாட்டில் வரவேற்புக் குழு செயலாளர் மோகன், நிர்வாகிகள் அமர்ஜித் கவுர், நாராயணா, ஆனிராஜா, சுப்பராயன், பெரியசாமி, ராமச்சந்திரன் உள்ளிட்டோர் கலந்து கொண்டனர்.
