பரந்தூர் விமான நிலையத்திற்கு எதிராக பொதுநல வழக்கு மட்டுமே தாக்கல் செய்யலாம்: உயர்நீதிமன்றம்
பரந்தூர் விமான நிலையம் அமைப்பதற்காக ஏகனாபுரம் கிராம ஏரியை கையகப்படுத்தும் முயற்சிக்கு எதிர்ப்பு தெரிவித்து தாக்கல் செய்யப்பட்ட வழக்கு, பொதுநல வழக்காக மட்டுமே தொடர முடியும் என நீதிபதி கூறியதால், மனுதாரர் அதை வாபஸ் பெற்றார்.
காஞ்சிபுரம் மாவட்டம், ஸ்ரீபெரும்புதூர் தாலுகா பரந்தூரில் பசுமை விமான நிலையம் அமைக்க அரசு முயற்சி மேற்கொண்டு வருகிறது. இதற்காக மொத்தம் 5,747 ஏக்கர் நிலம் கையகப்படுத்தப்பட உள்ளது.
இந்நிலையில், அந்தத் திட்டத்தில் ஏகனாபுரம் பகுதியில் உள்ள காளி ஏரியை உட்படுத்துவதற்கு எதிர்ப்பு தெரிவித்து, அங்கு நீர் பயன்படுத்தும் சங்கத்தின் தலைவர் கமலக்கண்ணன் சென்னை உயர்நீதிமன்றத்தில் வழக்கு தொடர்ந்தார்.
அவரது மனுவில், விமான நிலையத்திற்கு எடுத்துக்கொள்ளப்படும் நிலப்பரப்பில் சுமார் 26.54% நீர்நிலைகள் உள்ளன. ஏகனாபுரம் விவசாயிகள் பாசன வசதிக்காக முழுமையாக காளி ஏரியை மட்டுமே நம்பியுள்ளனர். வருவாய் துறை விதிகளின்படி நீர்நிலைகளை வேறு பயன்பாட்டிற்கு மாற்ற முடியாது. எனவே காளி ஏரியை விவசாயம் சாராத அல்லது வர்த்தக நடவடிக்கைகளுக்காக மாற்றக்கூடாது என்று அரசுக்கு உத்தரவிட வேண்டும் எனக் கோரினார்.
இந்த வழக்கை விசாரித்த நீதிபதி முகமது ஷபீக், தனிப்பட்ட மனுவாக அல்லாமல், பொதுநல வழக்காக மட்டுமே இதைப் பதிவு செய்ய முடியும் என்று தெரிவித்தார். இதையடுத்து, மனுதாரர் வழக்கைத் திரும்பப் பெற்றதாகக் கூறியதால், வழக்கை நீதிமன்றம் தள்ளுபடி செய்தது.
