நல்லகண்ணுவை சந்தித்து உடல்நலம் கேட்டறிந்த முதல்வர் மு.க.ஸ்டாலின்
சென்னை ராஜீவ் காந்தி அரசு பொது மருத்துவமனையில் சிகிச்சை பெற்று வரும் இந்திய கம்யூனிஸ்ட் கட்சியின் மூத்த தலைவர் நல்லகண்ணுவின் உடல்நிலை பற்றி முதல்வர் மு.க.ஸ்டாலின் நேரில் சென்று விசாரித்தார்.
சுதந்திரப் போராட்ட வீரரும், இந்திய கம்யூனிஸ்ட் மூத்த தலைவருமான நல்லகண்ணு, கடந்த ஆகஸ்ட் 22-ஆம் தேதி தனது இல்லத்தில் தவறி விழுந்து தலையில் காயம் அடைந்தார். இதையடுத்து அவர் நந்தனத்தில் உள்ள தனியார் மருத்துவமனையில் அனுமதிக்கப்பட்டார். அங்கு ஸ்கேன் எடுக்கப்பட்டு, தலையில் தையல் போடப்பட்டு, தீவிர சிகிச்சை அளிக்கப்பட்டது.
ஆனால், ஆகஸ்ட் 24-ஆம் தேதி மாலை உணவருந்தியபோது உணவுக்குழாயில் புரை ஏறியதால் சுவாசம் பாதிக்கப்பட்டது. அதனால் அதே இரவு 10.30 மணியளவில் அவசர சிகிச்சைக்காக ராஜீவ் காந்தி அரசு பொது மருத்துவமனைக்கு மாற்றப்பட்டார்.
அவரது வயதினால் ஏற்பட்ட பிற உடல்நலக்குறைவுகளுக்கும் சிகிச்சை அளிக்க, நரம்பியல், நுரையீரல், இருதய மற்றும் தீவிர சிகிச்சை நிபுணர்கள் அடங்கிய சிறப்பு மருத்துவக் குழு அமைக்கப்பட்டுள்ளது.
இந்த நிலையில், இன்று முதல்வர் மு.க.ஸ்டாலின் மருத்துவமனைக்கு சென்று, நல்லகண்ணுவின் உடல்நிலை குறித்து மருத்துவர்களிடமும், அருகிலிருந்தவர்களிடமும் கேட்டறிந்தார்.
இதற்கு முன்னர், நேற்று தனது எக்ஸ் பக்கத்தில் முதல்வர் பதிவு வெளியிட்டு, “மருத்துவமனையில் சிகிச்சை பெற்று வரும் தகைசால் தமிழர், தோழர் நல்லகண்ணு அய்யாவின் உடல்நிலை குறித்து தோழர் முத்தரசன், அமைச்சர் மா.சுப்பிரமணியன் ஆகியோரிடம் தொடர்ந்து தகவல் பெறுகிறேன். அவர் விரைவில் நலம் பெற வேண்டும் என விரும்புகிறேன்” என்று குறிப்பிட்டிருந்தார்.
