முதலீடுகளை ஈர்க்க 7 நாள் பயணம்: ஜெர்மனி, இங்கிலாந்து செல்லுகிறார் முதல்வர்
தமிழகத்துக்கு முதலீடுகளை ஈர்ப்பதற்கும், அயலக தமிழர்களை சந்திப்பதற்கும் முதல்வர் ஸ்டாலின் ஜெர்மனி, இங்கிலாந்தில் 7 நாட்கள் சுற்றுப்பயணம் மேற்கொள்கிறார். சென்னையில் இருந்து அவர் இன்று காலை விமானத்தில் புறப்படுகிறார்.
முதல்வர் ஸ்டாலின் இன்று காலை 9 மணிக்கு ஜெர்மனிக்கு விமானத்தில் புறப்பட்டு சென்று அங்கு அயலக தமிழர்களால் உற்சாக வரவேற்பு பெறுகிறார். அவருடன் துர்கா ஸ்டாலின், முதல்வரின் செயலர்கள் மற்றும் பாதுகாப்பு அதிகாரிகள் கூட சென்றுள்ளனர். ஜெர்மனியில் முதலீட்டாளர்களை அவர் நாளை (ஆகஸ்ட் 31) சந்திக்க உள்ளார்.
ஜெர்மனி பயணத்தை முடித்தவுடன், செப்டம்பர் 1-ம் தேதி அவர் இங்கிலாந்து தலைநகரான லண்டனுக்கு புறப்படுகிறார். செப்டம்பர் 2-ம் தேதி கேம்பிரிட்ஜ் பல்கலைக்கழக நிகழ்ச்சியில் பங்கேற்று, தொழில்முனைவோரை சந்திப்பார். செப்டம்பர் 3-ம் தேதி லண்டனில் நடைபெறும் முதலீட்டாளர்கள் சந்திப்பில் பங்கேற்று, தமிழகத்தில் தொழில் தொடங்க அழைப்பு விடுப்பார்.
லண்டனில் ஆக்ஸ்போர்டு பல்கலைக்கழகத்தில் செப்டம்பர் 4-ம் தேதி அயலக தமிழர் நலவாரியம் சார்பில் நடைபெறும் நிகழ்வுகளில் பங்கேற்று, பெரியார் படத்தை திறந்து வைக்கிறார். செப்டம்பர் 6-ம் தேதி மீண்டும் அயலக தமிழர் நலவாரிய நிகழ்வுகளில் பங்கேற்பார். இங்கிலாந்தில் 7-ம் தேதி புறப்பட்டு, செப்டம்பர் 8-ம் தேதி காலை சென்னை திரும்புவார்.
இதற்கிடையே, பல தொழில் நிறுவனங்களின் உயர் அதிகாரிகள் மற்றும் நிறுவனர்களை முதல்வர் சந்தித்து, பல புரிந்துணர்வு ஒப்பந்தங்கள் மேற்கொள்ளப்பட உள்ளன.
நேற்று நடைபெற்ற திருமண விழாவில், தனது வெளிநாட்டு பயணம் குறித்து முதல்வர் ஸ்டாலின் பேசியதாவது:
“திமுக ஆட்சி பொறுப்பேற்ற பிறகு, தமிழகத்திற்கு ரூ.10 லட்சம் கோடி மதிப்பிலான தொழில்களை ஈர்த்துள்ளோம். உலகின் புகழ்மிக்க அறிவுசார் நிறுவனமாக போற்றப்படும் ஆக்ஸ்போர்டு பல்கலைக்கழகத்தில் தந்தை பெரியாரின் படத்தை திறப்பேன். அவரது சிந்தனையை உலகம் தொழில் காட்சியில் பார்க்கப்போகிறது. இது தமிழகத்திற்கு பெருமை” என அவர் கூறினார்.
