அரசுப் பேருந்துகளில் கண்ணாடிகள் மற்றும் ஜன்னல்களில் ஒட்டப்பட்டுள்ள விளம்பரங்களை அகற்றக் கோரி, சென்னை உயர்நீதிமன்றத்தில் பொதுநல வழக்கு தாக்கல் செய்யப்பட்டுள்ளது.
நாமக்கல் மாவட்டம் ராசிபுரத்தைச் சேர்ந்த பாஸ்கர் தாக்கல் செய்த மனுவில், “தமிழ்நாடு அரசு போக்குவரத்துக் கழக பேருந்துகளில் கண்ணாடிகளிலும் ஜன்னல்களிலும் விளம்பரங்கள் ஒட்டப்பட்டுள்ளன. இதனால் பேருந்துக்குள் வெளியில் இருந்து பார்க்க முடியாமல் உள்ளது. இது பெண்கள், குழந்தைகள் உள்ளிட்ட பயணிகளின் பாதுகாப்புக்கு பெரிய அச்சுறுத்தலாகும்” எனக் கூறப்பட்டுள்ளது.
மேலும், 2011-ல் உச்சநீதிமன்றம் அனைத்து வாகனங்களின் கண்ணாடிகளில் கருப்பு தாள்கள் அல்லது மறைக்கும் வகையிலான பொருட்களை ஒட்டக்கூடாது எனத் தடை விதித்த உத்தரவை நினைவூட்டியுள்ளார். அந்த உத்தரவை பின்பற்றாமல் அரசுப் பேருந்துகளில் விளம்பரங்களை ஒட்டுவது, நீதிமன்ற அவமதிப்பாகும் என்றும், இது மோட்டார் வாகன சட்ட விதிகளுக்கு முரணானது என்றும் மனுவில் வலியுறுத்தப்பட்டுள்ளது.
மும்பை தாக்குதல், நிர்பயா பாலியல் வன்கொடுமை போன்ற சம்பவங்களை எடுத்துக்காட்டி, “பாதுகாப்பை கருத்தில் கொண்டு, பேருந்து கண்ணாடிகளில் ஒட்டப்பட்டுள்ள விளம்பரங்களை உடனடியாக அகற்ற அரசு உத்தரவிட வேண்டும்” என மனுதாரர் கோரியுள்ளார்.
இந்த மனுவை விசாரித்த தலைமை நீதிபதி எம்.எம். ஸ்ரீவஸ்தவா மற்றும் நீதிபதி சுந்தர்மோகன் அடங்கிய அமர்வு, இந்த விவகாரத்தில் உச்சநீதிமன்ற உத்தரவு மற்றும் சட்ட விதிகளை செயல்படுத்த எடுத்த நடவடிக்கைகள் குறித்து தமிழக அரசு அறிக்கை அளிக்க உத்தரவிட்டது. பின்னர் விசாரணை இரண்டு வாரங்களுக்கு ஒத்திவைக்கப்பட்டது.
