ஒரே எதிரி திமுக என்பதை மனதில் வைத்து தேர்தல் பணியாற்றுங்கள்: அதிமுக மாவட்ட செயலாளர்களுக்கு பழனிசாமி அறிவுரை
பாஜக முன்னாள் தலைவர் அண்ணாமலையை யாரும் விமர்சிக்க கூடாது. நமது ஒரே எதிரி திமுக என நினைத்து தேர்தல் பணியாற்றுங்கள் என அதிமுக மாவட்ட செயலாளர்களுக்கு பொதுச்செயலாளர் பழனிசாமி அறிவுறுத்தியுள்ளார்.
அதிமுக சார்பில் தமிழகம் முழுவதும் உள்ள 6,000க்கும் மேற்பட்ட வாக்குச்சாவடிகள் அளவில் பாக கிளை நிர்வாகிகள் நியமிக்கப்பட்டுள்ளனர். இதுவரை அவர்களுக்கு கட்சி சார்பில் எந்தப் பணிகளும் வழங்கப்படவில்லை. இதனால், பாக கிளைகளை வலுப்படுத்துவது குறித்து ஆலோசிக்க அதிமுக மாவட்ட செயலாளர்கள் கூட்டம், பொதுச்செயலாளர் பழனிசாமி தலைமையில் சென்னையில் நேற்று நடைபெற்றது.
பழனிசாமி கூறியவை: கூட்டணிக்குள் குழப்பம் ஏற்படுத்தும் விதமாக தேவையற்ற விவாதங்கள் மற்றும் பேச்சுகளை கட்சி நிர்வாகிகள் தவிர்க்க வேண்டும். கூட்டணி தொடர்பான விவாதங்களையும் பொதுவெளியில் பேசுவதையும், சமூக வலைத்தளங்களில் பகிர்வதையும் தவிர்க்கவும். அண்மையில் அண்ணாமலை நம்மை பற்றி எதுவும் பேசவில்லை; நீங்கள் அவரைப் பற்றி எதுவும் பேச வேண்டாம்.
நமது ஒரே எதிரி திமுக என்பதை நினைத்து அனைவரும் உற்சாகமாக தேர்தல் பணியாற்ற வேண்டும். 2026 சட்டப்பேரவைத் தேர்தலில் அதிமுக ஆட்சி அமைக்க தேவையான நடவடிக்கைகளை வேகமாக செய்யுங்கள். விஜய் கட்சி புதியது. அந்தக் கட்சி வளர்ச்சிக்காக விஜய் பேசுவார், அதை யாரும் கவலைப்பட வேண்டியதில்லை. நான் 3 கட்ட பிரச்சார பயணத்தை முடித்துள்ளேன்; இதில் நிறைய மக்களை சந்தித்தேன். அவர்கள், திமுக ஆட்சியின் மீது கடும் கோபத்தில் உள்ளனர். களம் அதிமுகவுக்கு சாதகமாக உள்ளது. இதுவரை சென்ற 118 தொகுதிகளில் நிச்சயமாக 100 தொகுதிகளுக்கு மேல் வெற்றி பெறுவோம்.
புதிதாக நியமிக்கப்பட்டுள்ள பாக கிளை நிர்வாகிகளுக்கு வாக்காளர் பட்டியலை சரிபார்க்க, வாக்குச்சாவடி நிகழ்வுகளை நடத்த, ஆள் மாறி வாக்களிப்பதை தடுப்பது போன்ற பயிற்சிகளை வழங்க வேண்டும்.
ஒவ்வொரு வாக்குச்சாவடியிலும் சுமார் 1,000 வாக்காளர்களை அந்த பாக கிளை நிர்வாகிகளும் பரிச்சயப்படுத்துவதற்கான நடவடிக்கைகளையும் அவர்களுக்கு பயிற்சி வழங்க வேண்டும். இதை முறையாக செய்தால், 2026 தேர்தலில் அதிமுக வெற்றி பெறுவதை யாரும் தடுக்க முடியாது. மக்கள் விரோத திமுக ஆட்சியை அகற்றும் வரை மக்களும், நாமும் ஓயமாட்டோம் என்று அவர் தெரிவித்தார்.
இக்கூட்டத்தில் அதிமுக அவைத் தலைவர் தமிழ் மகன் உசேன், துணைப் பொதுச்செயலாளர்கள் நத்தம் விஸ்வநாதன், கே.பி. முனுசாமி, பொருளாளர் திண்டுக்கல் சீனிவாசன், தலைமை நிலைய செயலாளர் எஸ்.பி. வேலுமணி உள்ளிட்டோர் கலந்து கொண்டனர்.
