“மக்கள் பிரச்சினைக்காக அல்ல, தனது படத்திற்காகவே பிரதமரை சந்தித்தவர் விஜய்” – நடிகர் ரஞ்சித் விமர்சனம்
கோவை துடியலூரில், இந்து முன்னணி சார்பில் நடைபெற்ற விநாயகர் சதுர்த்தி விழாவில், திரைப்பட நடிகர் ரஞ்சித் ஆவேசமாக பேசினார்.
அவர் கூறியதாவது:
“நாம் நம்முடைய சொந்த நாட்டிலேயே அகதிகளாக வாழ்கிற நிலைமை உள்ளது. பொட்டு வைப்பது, கடவுளை வணங்குவது போன்ற விஷயங்களிலும் பிரச்சினைகள் எழுகின்றன. என்னை நூறு முறை ‘சங்கி’ என்று அழைத்தாலும், நான் கவலைப்படுவதில்லை. எல்லா கடவுளும் ஒன்றே; வழிபடும் முறைதான் வேறுபடும்.
சமீபத்தில் மதுரையில் நடந்த தவெக மாநாட்டில் விஜய், ‘நான் உச்சியில் இருந்தபோது வந்தவன்; பிழைப்பு தேடி வரவில்லை’ என்று கூறியுள்ளார். பிரதமரை நோக்கி சொடுக்கு போட்டு பேசியுள்ளார். பிரதமர் மோடி, இஸ்லாமிய மக்களுக்கு துரோகம் செய்தார் என்றும் கூறினார். ஆனால், இதே விஜய் 2014 ஏப்ரல் 16 அன்று கோவையில், பிரதமர் மோடியை சந்திப்பதற்காக கைகளை கட்டி, பூனைக்குட்டி போல அமர்ந்திருந்தார்.
அப்போது விஜய் பிரதமரை ஏன் சந்தித்தார்? கச்சத்தீவை மீட்க வேண்டும் என்று வலியுறுத்தவா? மீனவர் பிரச்சினையை சொல்லவா? இல்லை. தன்னுடைய தலைவா படம் ஓடுவதற்காகவே சந்தித்தார். இன்று அதே பிரதமரை நோக்கி, சொடுக்கு போட்டு பேசுகிறார்.
உலகமே வியந்து பார்ப்பவர் பிரதமர் மோடி. அவரிடம் இப்படி சொடுக்கு போட்டு பேசுவதற்கு தகுதி வேண்டும். தமிழக முதல்வரை ‘அங்கிள்’ என்றும், பிரதமரை ‘மிஸ்டர்’ என்றும் அழைக்கிறார். இதுதான் அரசியல் மரியாதையா? எனக்கு வரும் கோபத்தால், ஓங்கி குத்த வேண்டும் போல தோன்றுகிறது. அதை நாம் ஓங்கி ஓட்டாகக் குத்துவோம்” என்று அவர் கடுமையாக விமர்சித்தார்.
