திமுக அரசின் தோல்வியை மறைக்க எதற்கெடுத்தாலும் மத்திய அரசு மீது குற்றம் சாட்டுகிறார் ஸ்டாலின் – இபிஎஸ் குற்றச்சாட்டு
அதிமுக பொதுச்செயலாளர் எடப்பாடி பழனிசாமி, “தோல்வி மாடல் ஆட்சியில் தமிழகத்தை சுவர்க்கருகே தள்ளிய திமுக, தன் தவறுகளை மறைக்க எப்போதும் மத்திய அரசை குறிவைக்கிறது” எனக் கூறியுள்ளார்.
இதுகுறித்து வெளியிட்ட அறிக்கையில் அவர் தெரிவித்ததாவது:
“திருப்பூர் பின்னலாடைத் தொழில் சிக்கலில் இருப்பதை காரணம் காட்டி, பிரதமரிடம் நடவடிக்கை எடுக்க வேண்டும் என ஸ்டாலின் பதிவு செய்துள்ளார். ஆனால், 2021-ல் ஆட்சிக்கு வந்ததிலிருந்து, ஜவுளி மற்றும் பின்னலாடைத் துறைக்கு மிகப்பெரிய இடையூறுகளை உருவாக்கியது இவரது கொள்கைகள்தான்.
வரி உயர்வு, மின்கட்டண அதிகரிப்பு, முதலீடுகளை ஈர்க்க தவறுதல், வெளிநாட்டு முதலீடுகளை மற்ற மாநிலங்களுக்கு தள்ளுதல் போன்ற செயல்கள் திமுக அரசின் தோல்விகளை வெளிப்படுத்துகின்றன. கோவை, திருப்பூர் உள்ளிட்ட இடங்களில் தொழில் துறை ஏற்கெனவே நலிவடைந்துள்ளது.
இந்நிலையில், அமெரிக்க இறக்குமதி வரியை காரணம் காட்டி பிரதமரிடம் கண்ணீர் வடிப்பது, தன் தோல்வியை மறைக்கும் முயற்சிதான். உண்மையில், 52 மாத திமுக ஆட்சியின் தவறான முடிவுகளால் ஜவுளி, பின்னலாடை மற்றும் ஆயத்த ஆடைத் துறைகள் கடுமையாக பாதிக்கப்பட்டுள்ளன.
அமெரிக்காவின் கூடுதல் வரி இந்திய ஏற்றுமதிக்கு சவாலாக இருந்தாலும், உள்நாட்டு உற்பத்தியைத் தடுக்காமல் ஊக்குவித்தால், பிற நாடுகளுக்கு ஏற்றுமதி செய்ய வழி இருக்கும். அதற்காக, தொழில்துறைக்கு நிவாரணம், கடன் தள்ளுபடி, வட்டி சலுகை வழங்க வேண்டும். ஆனால், ஸ்டாலின் அரசு எந்த நடவடிக்கையும் எடுக்கவில்லை” என அவர் தெரிவித்துள்ளார்.
