திமுக அரசு மீது ஆசிரியர்கள் அதிருப்தியில் உள்ளனர்: ஆரம்பப்பள்ளி ஆசிரியர் கூட்டணி கருத்து
திமுக அரசு தேர்தல் வாக்குறுதிகளை நிறைவேற்றாததால், ஆசிரியர்கள் அதிருப்தியுடன் உள்ளனர் என்று தமிழ்நாடு ஆரம்பப்பள்ளி ஆசிரியர் கூட்டணி மாநில பொதுச் செயலாளர் ச. மயில் தெரிவித்துள்ளார்.
இந்த கூட்டணியின் சார்பில், கோவில்பட்டி வட்டாரத்தில் பணியிலிருந்து ஓய்வு பெற்ற 25 ஆசிரியர்களுக்கு பாராட்டு விழா நேற்று நடைபெற்றது. வட்டாரத் தலைவர் பா. மணிமொழி நங்கை தலைமையேற்றார். மாவட்டத் தலைவர் சு. செல்வராஜ், மாநில பொதுக்குழு உறுப்பினர் இ. ஸ்ரீதரன், மாவட்ட துணைத் தலைவர் ஜீ. மகேந்திரன் ஆகியோர் முன்னிலையில் இருந்தனர். மாநில பொதுச் செயலாளர் ச. மயில் சிறப்புரை நிகழ்த்தி, ஓய்வு பெற்ற ஆசிரியர்களை கௌரவித்து நினைவுப் பரிசுகளை வழங்கினார்.
பின்னர் பேசிய அவர், “திமுக ஆட்சி காலத்தில் ஆசிரியர்கள் மற்றும் அரசு ஊழியர்களுக்கு அளிக்கப்பட்ட எந்த வாக்குறுதியும் நிறைவேற்றப்படவில்லை. இதனை எதிர்த்து நாங்கள் தனிச் சங்கமாகவும், மற்ற ஆசிரியர் சங்கங்களுடன் இணைந்தும் போராட்டங்களை நடத்தி வருகிறோம். பழைய ஓய்வூதிய திட்டம் மீண்டும் அமல்படுத்தப்பட வேண்டும். இடைநிலை ஆசிரியர்களுக்கு மத்திய அரசின் அளவுக்கு இணையான ஊதியம் வழங்கப்பட வேண்டும் என்பன உள்ளிட்ட 10 முக்கிய கோரிக்கைகளை வலியுறுத்தி, கடந்த 22ம் தேதி கோட்டை முற்றுகை போராட்டம் நடத்தப் போவதாக தொடக்கக் கல்வி ஆசிரியர் சங்கங்களின் கூட்டமைப்பு அறிவித்தது,” என்றார்.
“இதற்கு முன், ஆகஸ்ட் 18ம் தேதி பள்ளிக்கல்வித் துறை அமைச்சர் தலைமையில் நடந்த கலந்துரையாடலில் எங்களது கோரிக்கைகள் நிறைவேற்றப்படும் என உறுதி அளிக்கப்பட்டது. ஆனால் இதுவரை எந்த நடவடிக்கையும் எடுக்கப்படவில்லை. இதனால் தொடக்கக் கல்வி ஆசிரியர்கள் மிகுந்த அதிருப்தியில் உள்ளனர். திமுக அரசு தனது தேர்தல் வாக்குறுதிகளை நிறைவேற்றவில்லை என்பதால் அரசு ஊழியர்களும், ஆசிரியர்களும் கோபத்தில் உள்ளனர். கடந்த 12 ஆண்டுகளாக தொடக்கக் கல்வித் துறையில் நிரந்தர ஆசிரியர் நியமனம் செய்யப்படவில்லை. அரசின் புள்ளிவிவரப்படி 5,500 காலிப் பணியிடங்கள் உள்ளன. அதில் 2,430 பணியிடங்கள் மட்டுமே நிரப்பப்பட்டுள்ளன. எங்களது கோரிக்கைகளை அடுத்த 5 மாதங்களுக்குள் அரசு நிறைவேற்ற வேண்டும்,” எனக் கூறினார்.
