“எங்கு பத்திரப் பதிவு நடந்தாலும் 10% கமிஷன் அவசியம்…” – எடப்பாடி பழனிசாமி குற்றச்சாட்டு
“தமிழகத்தில் எங்கு பத்திரப் பதிவு நடந்தாலும் 10 சதவீத கமிஷன் கட்டாயமாக அமைச்சருக்கு செல்கிறது. அதிமுக ஆட்சிக்கு வந்ததும் இந்த ஊழலை முழுமையாக ஆராய்ந்து நடவடிக்கை எடுப்போம்” என அதிமுக பொதுச் செயலாளர் எடப்பாடி பழனிசாமி தெரிவித்தார்.
மதுரை ஒத்தக்கடையில் நடைபெற்ற ‘மக்களை காப்போம், தமிழகத்தை மீட்போம்’ எனும் பிரச்சாரத்தில் பேசிய அவர் கூறியதாவது:
“முதல்வர் ஸ்டாலின் கனவுலகில் திளைக்கிறார். அடுத்த ஆண்டு தேர்தலில் திமுக மீண்டும் ஆட்சி அமைக்கும் என்று கற்பனை செய்து கொள்கிறார். அவர் கூட்டணியை நம்புகிறார்; நாங்கள் மக்களை நம்புகிறோம்.
ஆட்சிக்கு வரவேண்டும் என்பதைக் குறிக்கோளாக வைத்திருப்பது மக்கள் தான். மக்கள் விரும்பினால் மட்டுமே யாரும் ஆட்சி அமைக்க முடியும். ஏற்கனவே மக்கள் அதிமுகவையே ஆட்சிக்கு கொண்டு வர வேண்டும் என்று தீர்மானித்து விட்டனர். அடுத்த ஆண்டு நடைபெறும் தேர்தலில் அதிமுக கூட்டணி வெற்றிபெற்று, தனி பெரும்பான்மையுடன் ஆட்சி அமைக்கும். ஸ்டாலின் எவ்வளவு கூட்டணிகளை வைத்தாலும் வெற்றி பெற முடியாது.
திமுக அரசு மீது மக்களின் நம்பிக்கை முற்றிலும் சிதைந்துவிட்டது. உறுப்பினர்கள் தாமாக முன்வந்து சேர்வதற்குப் பதிலாக வீடு வீடாகச் சென்று கெஞ்சிக் கொண்டே உறுப்பினர்களை சேர்க்கும் நிலைக்கு தள்ளப்பட்டுள்ளனர். தொண்டர்கள் இருந்திருந்தால் இப்படிச் செய்ய வேண்டிய அவசியமே இருக்காது. அதிமுகவுக்கு தொண்டர்கள் பலமும், நிர்வாகிகள் வலிமையும் இருப்பதால் மக்கள் எங்களை நம்புகிறார்கள்.
முன்னொரு காலத்தில் எந்தக் கட்சியும் இவ்வாறு கட்டாயமாக உறுப்பினர் சேர்க்கை நடத்தவில்லை. மக்கள் விரும்பினால் தான் விருப்பக் கட்சியில் உறுப்பினர்களாக சேர்ந்தார்கள். ஆனால் திமுக அரசு, நலத்திட்ட உதவிகளை நிறுத்துவதாக மிரட்டித் தான் உறுப்பினர்களை சேர்க்கிறது. மக்களை அச்சுறுத்தினாலும், அவர்களுக்கு துணையாக அதிமுக இருக்கும்.
பெண்கள் உரிமைத் தொகையை திமுக அரசு தனது சொந்த வருமானத்தில் இருந்து தரவில்லை. கடன் வாங்கித் தான் வழங்குகிறது. அந்தக் கடனை மக்களே ஏற்க வேண்டியுள்ளது. வருமானத்தை அதிகரிக்காமல் கடன் வாங்கி நலத்திட்டம் செய்வது எப்போதுமே மக்களுக்கே சுமையாகும்.
அதிமுக தொடர்ந்து வலியுறுத்தியதால் தான் ஆட்சிக்கு வந்து 28 மாதங்கள் கழித்து உரிமைத் தொகையை வழங்கினர். இப்போது விதிகளை தளர்த்தி மேலும் 30 லட்சம் பெண்களுக்கு வழங்குவதாக அறிவிக்கிறார்கள். இது மக்களின் பிரச்சினையை உணர்ந்து செய்யப்படவில்லை; தேர்தலை நினைத்தே செய்யப்படுகிறது. உண்மையான அரசு மக்களின் கஷ்டத்தை உணர்ந்து உதவி செய்ய வேண்டும்; தேர்தலை நினைத்து அல்ல.
இந்தத் தொகுதியின் அமைச்சர் யார் என்பதை எல்லோரும் அறிவார்கள். பத்திரப் பதிவுத்துறையில் ஊழல் குவிந்து கிடக்கிறது. செந்தில் பாலாஜி ‘பத்து சதவீத அமைச்சர்’ என்று மக்கள் சொல்லும் அளவுக்கு நிலைமை மோசமாக உள்ளது. எங்கு பதிவு நடந்தாலும் 10 சதவீத கமிஷன் கட்டிய பின்னரே பதிவு நடைபெறுகிறது. கஷ்டத்தில் உள்ளவர்கள் இதனால் மேலும் சிரமப்படுகிறார்கள்.
முழு தமிழகத்திலும் 582 பத்திரப் பதிவு அலுவலகங்கள் உள்ளன. ஒரே அலுவலகத்தில் ஒரு பதிவாளர் ஓர் ஆண்டுக்கு மேல் பணியாற்றுவதில்லை. இடமாற்றம் செய்வதன் மூலம் பெரிய அளவில் பணம் வசூலிக்கப்படுகிறது. அதிமுக ஆட்சிக்கு வந்ததும் இதற்கெல்லாம் முற்றுப்புள்ளி வைப்போம்.
அடுத்த அதிமுக அரசு முந்தையதைப் போல இருக்காது. நானே முதல்வராக இருந்த காலத்தில், இப்படிப்பட்ட மோசமான செயல்களுக்கு இடமளிக்கவில்லை. ஆனால் இன்றைய திமுக அரசு மிகக் கேவலமான ஊழல் ஆட்சியாக உள்ளது. எல்லா துறைகளிலும் லஞ்சமே பிரதானம். இதற்கு மக்கள் துணையுடன் முற்றுப்புள்ளி வைப்போம்.
பொதுக்கூட்டம் நடத்தவும், ஆர்ப்பாட்டம் செய்யவும் அனுமதி தராத அரசாக திமுக உள்ளது. ஆனால் அதிமுக ஆட்சியில் மக்கள் விரும்பியபடி போராட்டங்கள் நடத்த அனுமதி அளிக்கப்பட்டது. நான் பத்து முறை தேர்தலில் போட்டியிட்டுள்ளேன். எதற்கும் அச்சப்பட மாட்டேன்.
ஸ்டாலின் வெளிநாடு சென்று மூன்று புரிந்துணர்வு ஒப்பந்தங்கள் போட்டுள்ளார். அதில் இரண்டைச் சேர்ந்த தொழிற்சாலைகள் ஏற்கனவே அதிமுக ஆட்சியில் தொடங்கப்பட்டவை. இப்போது அவற்றை விரிவுபடுத்துவதாகக் கூறி ஜெர்மனியில் ஒப்பந்தம் போட்டுள்ளார். புதிதாக ஒன்று மட்டுமே. இதற்காக ஜெர்மனி செல்ல வேண்டிய அவசியமே இல்லை. இதற்கு பின்னால் வேறு காரணங்கள் இருக்கின்றன; மக்கள் புரிந்து கொள்ள வேண்டும்.
திமுக – பாஜக கூட்டணி இருந்த காலத்தை மறந்துவிட்டு, இப்போது அதிமுக – பாஜக கூட்டணியை விமர்சிப்பது முற்றிலும் தவறு. கூட்டணி சூழ்நிலைக்கேற்ப அமைகிறது; ஆனால் கொள்கை நிலையானது. எதிரிகளை வீழ்த்தும் நோக்கத்தில்தான் அதிமுகவும் பாஜகவும் இணைந்துள்ளன. அடுத்த ஆண்டு தேர்தலில் இந்த கூட்டணி வெற்றி பெற்று ஆட்சி அமைப்பது உறுதி.
திமுக ஆட்சியில் வரிகள் எல்லாம் உயர்ந்துவிட்டன. கட்டுமானப் பொருட்களின் விலை அதிகரித்து, மக்கள் வீடு கட்ட முடியாத நிலைக்கு தள்ளப்பட்டுள்ளனர். இதை கட்டுப்படுத்தும் திறமை ஸ்டாலினுக்கும், அவரது அமைச்சருக்கும் இல்லை.
நீட் தேர்வை ரத்து செய்வோம் என்று கூறி மக்களை ஏமாற்றி ஆட்சிக்கு வந்தனர். நீதிமன்றத் தீர்ப்பால் அது சாத்தியமில்லை என்று இப்போது சொல்கிறார்கள். இதை நம்பிய மாணவர்கள் தயாராகாமல் இருந்து உயிரிழந்தனர். எங்கள்மீது பழி போட்டு மக்களை ஏமாற்றி தான் திமுக ஆட்சிக்கு வந்துள்ளது,” என்று எடப்பாடி பழனிசாமி குற்றஞ்சாட்டினார்.
