கட்சி ஜனநாயகம் மேடையில்தான் எடப்பாடி பேசுகிறார்: செங்கோட்டையன் குற்றச்சாட்டு
அதிமுக முன்னாள் அமைச்சர் கே.ஏ. செங்கோட்டையன் தனது கட்சிப் பொறுப்புகளை நீக்கியதை எதிர்த்து, “ஜனநாயக நடைமுறையைப் பற்றி எடப்பாடி மேடையில் மட்டுமே பேசுகிறார். நான் கட்சி ஒன்றிணைப்பு பற்றி கருத்து தெரிவித்ததை ஜனநாயக முறையில் விளக்கம் கேட்க வேண்டியது தான். ஆனால் அதற்கு பதிலாக பொறுப்புகளை பறித்துவிட்டார்” என்று விமர்சித்துள்ளார்.
முன்னதாக, அதிமுக பொதுச் செயலாளர் எடப்பாடி பழனிசாமி உத்தரவின் பேரில் செங்கோட்டையன் கட்சிப் பொறுப்புகளில் இருந்து நீக்கப்பட்டார்.
இதுகுறித்து கோபிசெட்டிபாளையத்தில் செய்தியாளர்களை சந்தித்த செங்கோட்டையன் கூறியதாவது:
“நேற்று பத்திரிக்கையாளர்களிடம், பிரிந்து சென்ற தொண்டர்களும் பொதுமக்களும் மீண்டும் ஒன்றிணைய வேண்டும் என்று தெரிவித்தேன். அதற்கு கட்சி ஜனநாயக முறைப்படி என்னிடம் விளக்கம் கேட்டிருக்கலாம். ஆனால் எடப்பாடி மேடையில் மட்டும், ‘எங்கள் கட்சியில் யார் வேண்டுமானாலும் பேசலாம்’ என்று கூறுகிறார். நடைமுறையில் அப்படி இல்லை.
அதிமுக ஒன்றிணைய வேண்டும் என்று தொண்டர்களும் பொதுமக்களும் வலியுறுத்துகின்றனர். பிரிந்தவர்கள் கூட ‘காலில் விழுந்து கேட்டாலும் இயக்கத்தில் சேர்த்துக் கொள்ளுங்கள்’ என்று கூறுகிறார்கள். ஆனால் அதற்கான நடவடிக்கை எதுவும் எடுக்கப்படவில்லை. புரட்சித் தலைவரால் வளர்க்கப்பட்ட இந்த இயக்கத்தில் நான் தொடர்கிறேன். எனவே, கட்சி ஒன்றிணைப்பு குறித்து கருத்து கூறுவது இந்த இயக்கத்திற்கு நல்லதே. அதற்காகத்தான் அந்த அறிக்கையை வெளியிட்டேன்.
என்னை நீக்கியது கட்சிக்கு பயன்தருமா, பாதிப்பை உண்டாக்குமா என்பதை காலம் தான் நிரூபிக்கும். ஒன்றிணைய வேண்டும் என்ற தொண்டர்களின் கோரிக்கையை பொதுச் செயலாளர் புறக்கணிக்கிறாரா என்பதையும் அவர் தான் விளக்க வேண்டும்.
பாஜகவின் நயினார் நாகேந்திரன், எச்.ராஜா, தேமுதிக பொதுச் செயலாளர் பிரேமலதா, அமமுக பொதுச் செயலாளர் டிடிவி தினகரன் உள்ளிட்டோர், நான் கூறிய கருத்து நியாயமானதே என்று ஆதரவு தெரிவித்துள்ளனர். இது என் நலனுக்காக அல்ல, கட்சியின் நலனுக்காகவே சொல்லப்பட்டதுதான்,” என்றார்.
அதற்கு செய்தியாளர்கள், “உங்கள் கட்சியிலிருந்து யாரும் இதுவரை திறந்தவெளியில் ஆதரவு தெரிவிக்கவில்லையே?” எனக் கேட்டனர். அதற்கு செங்கோட்டையன், “சிலர் என்னுடன் தொலைபேசியில் தொடர்பு கொண்டுள்ளனர். அது காலப்போக்கில் வெளிப்படும்,” எனக் குறிப்பிட்டார்.
மேலும், “மூத்த தலைவர்களுடன் ஆலோசனை செய்த பிறகே எடப்பாடி இந்த முடிவை எடுத்தாரா?” என்ற கேள்விக்கு, “இதற்கும் காலம் தான் பதில் சொல்வது,” எனச் சுருக்கமாக பதிலளித்தார்.
இதே நேரத்தில், செங்கோட்டையன் கட்சிப் பொறுப்பில் இருந்து நீக்கப்பட்டதை வரவேற்ற அதிமுகவினர், கோபியை அடுத்த நம்பியூரில் பட்டாசு வெடித்தும், இனிப்பு பகிர்ந்தும் கொண்டாடினர்.
