காஞ்சிபுரம் சர்க்கரை ஆலையை ரூ.450 கோடிக்கு வாங்கிய சசிகலா – சிபிஐ எப்ஐஆர் தகவல்
பணமதிப்பிழப்பு காலத்தில், காஞ்சிபுரத்தில் உள்ள சர்க்கரை ஆலையை ரூ.450 கோடிக்கு வி.கே. சசிகலா வாங்கியதாக, சிபிஐ பதிவு செய்துள்ள முதல் தகவல் அறிக்கையில் (FIR) வெளிப்படுத்தப்பட்டுள்ளது.
காஞ்சிபுரம் மாவட்டம் பழைய சீவரத்தில் செயல்பட்ட பத்மாதேவி சுகர்ஸ் லிமிட்டெட் எனும் சர்க்கரை ஆலை, இந்தியன் ஓவர்சீஸ் வங்கியில் ரூ.120 கோடியும், மேலும் பல வங்கிகள் மற்றும் நிதி நிறுவனங்களில் நூற்றுக்கணக்கான கோடி ரூபாய் கடனும் பெற்றிருந்தது. இக்கடன்களுக்கு அடமானமாக வைக்கப்பட்டிருந்த இயந்திரங்களை, வங்கிகளுக்குத் தெரியாமல் விற்று, மோசடி செய்ததாக ஒரு நிதி நிறுவனம் சிபிஐக்கு புகார் அளித்தது.
இந்த புகாரின் பேரில், உயர்நீதிமன்ற உத்தரவின்படி, சிபிஐ பத்மாதேவி சுகர்ஸ் மீது வழக்குப்பதிவு செய்தது. அதனைத் தொடர்ந்து, 2025 ஆகஸ்ட் மாதத்தில் சென்னை, திருச்சி, தென்காசி உள்ளிட்ட 6 இடங்களில் சோதனைகள் நடத்தப்பட்டது. பின்னர், சிபிஐ தயாரித்த எப்ஐஆர் தற்போது வெளியாகியுள்ளது.
அதில், முன்னாள் முதல்வர் ஜெயலலிதாவின் நெருங்கிய உறவினரும், தோழியுமான வி.கே. சசிகலா, பணமதிப்பிழப்பு காலத்தில் பழைய ரூ.500, ரூ.1000 நோட்டுகளில் ரூ.450 கோடி ரொக்கத்தை கொடுத்து, அந்த ஆலையை பினாமி பெயரில் வாங்கியதாகக் கூறப்பட்டுள்ளது.
மேலும், பத்மாதேவி சுகர்ஸ் நிறுவன நிதி மேலாண்மை பார்த்த ஹிதேஷ் ஷிவ்கன் படேல், ஆலையை விற்கும் போது ரூ.450 கோடி பெற்றதாகவும், அதற்காக ஒரு புரிந்துணர்வு ஒப்பந்தத்தில் கையெழுத்திட்டதாகவும் சிபிஐ எப்ஐஆரில் குறிப்பிடப்பட்டுள்ளது. ஒப்பந்தம் நடந்திருந்தபோதும், ஆலை பினாமி பெயரில் சசிகலாவின்கண் இருந்தது என்பதை, 2020ஆம் ஆண்டு வருமானவரி துறை நடத்திய விசாரணையும் உறுதிப்படுத்தியதாக சிபிஐ குறிப்பிட்டுள்ளது.
இதன் அடிப்படையில், வருமானவரி துறை அந்த ஆலையை பினாமி சொத்து என அறிவித்து, சசிகலாவே அதன் உண்மையான உரிமையாளர் என சுட்டிக்காட்டியது. இதற்கிடையில், இந்தியன் ஓவர்சீஸ் வங்கியும் பத்மாதேவி சுகர்ஸ் நிறுவனத்தின் கடன் கணக்குகளை மோசடியாக அறிவித்தது.
இத்தகவல்களின் பேரில், ஹிதேஷ் ஷிவ்கன் படேல், தினேஷ் படேல், தம்பூராஜ் ராஜேந்திரன், பாண்டியராஜ், நிதி அதிகாரி வெங்கட பெருமாள் முரளி உள்ளிட்டோருக்கு எதிராக மோசடி மற்றும் பல்வேறு குற்றப்பிரிவுகளின் கீழ் வழக்குப்பதிவு செய்யப்பட்டுள்ளதாக சிபிஐ கூறியுள்ளது.
