“சமூக நீதியின் சின்னமாக திமுக திகழ்கிறது” – துணை முதல்வர் உதயநிதி ஸ்டாலின் பெருமிதம்
துணை முதல்வர் உதயநிதி ஸ்டாலின், “சமூகநீதிக்கு அடையாளமாக நிற்பது திமுக” என்று பெருமிதத்துடன் கூறினார்.
பல நிகழ்ச்சிகளில் பங்கேற்பதற்காக அவர் நேற்று காஞ்சிபுரம் வந்தார். முதலில் காஞ்சிபுரம் சட்டப்பேரவைத் தொகுதி ஆலோசனைக் கூட்டத்தில் கலந்துகொண்டார். அங்கு, வரவிருக்கும் சட்டமன்றத் தேர்தலை சந்திப்பது எப்படி, வாக்குச்சாவடி முகவர்கள் எந்த விதத்தில் செயல்பட வேண்டும் என்பது குறித்து ஆலோசித்தார். மேலும், திமுக வெற்றி பெறுவதற்கான நடைமுறைகளை விளக்கி, நிர்வாகிகளின் கருத்துக்களையும் கேட்டார்.
பின்னர், அரசு சார்பில் நலத்திட்ட உதவிகள் வழங்கும் விழா நடைபெற்றது.
அப்போது உதயநிதி ஸ்டாலின் கூறியதாவது:
“இன்று காஞ்சிபுரத்தில் 5 ஆயிரம் பேருக்கு நலத்திட்ட உதவிகள் வழங்கும் விழாவில் பங்கேற்பதில் பெரும் மகிழ்ச்சி. இதில் 90 சதவீதம் பெண்கள் கலந்து கொண்டுள்ளனர். அவர்களின் முகத்தில் தெரியும் மகிழ்ச்சி – இதுவே திராவிட மாதிரி ஆட்சியின் வெற்றி.
ஒவ்வொரு கட்சிக்கும் தனித்துவமான அடையாளம் உண்டு. பாஜகவின் அடையாளம் அடக்குமுறை; அதிமுகவின் அடையாளம் அடிமைத்தனம்; ஆனால் திமுகவின் அடையாளம் சமூகநீதி. முதல்வர் பொறுப்பேற்றவுடன், அவர் முதல் கையெழுத்து மகளிர் விடியல் பயணத்துக்காக இருந்தது. தொடர்ந்து, மகளிர் உதவித் தொகை திட்டமும் செயல்படுத்தினார். இன்னும் சேராத பெண்களும் ‘உங்களுடன் ஸ்டாலின்’ முகாமில் மனு அளித்து வருகிறார்கள். அவர்களுக்கும் அந்த நிதி விரைவில் வழங்கப்படும்.
மாணவர்களுக்கு வழங்கப்படும் காலை உணவுத் திட்டம் பெரும் வரவேற்பைப் பெற்றுள்ளது. இதை பஞ்சாப் முதலமைச்சர் பாராட்டி, அவர்களுடைய மாநிலத்திலும் அமல்படுத்த திட்டமிட்டுள்ளார். வீட்டுமனை பட்டா என்பது பலரின் கனவு. இனி அரசு தானே உங்களை நாடி வந்து பட்டா வழங்குகிறது. இனி நீங்கள் வசிக்கும் இடமே உங்கள் சொத்து என்பதில் நிம்மதியுடன் இருக்கலாம்.
வெளிநாட்டில் முதலீடுகளை ஈர்க்கும் வகையில் முதல்வர் 15 ஆயிரம் கோடி ரூபாய் மதிப்பிலான ஒப்பந்தங்களை பெற்றுள்ளார். அவரின் அயராத முயற்சிகளால் தமிழ்நாடு தனித்த இடத்தைப் பெற்றுள்ளது. அரசு உங்களுக்கு துணையாக இருப்பதுபோல, நீங்கள் அரசுக்கு துணையாக இருக்க வேண்டும்” என அவர் வலியுறுத்தினார்.
இந்நிகழ்ச்சியில் மொத்தம் 4,997 பேருக்கு ரூ.215 கோடி மதிப்பிலான நலத்திட்ட உதவிகள் வழங்கப்பட்டன. புதிய கட்டிடங்களுக்கு அடிக்கல் நாட்டியதுடன், பணி நிறைவுற்ற கட்டிடங்களையும் திறந்து வைத்தார்.
இவ்விழாவில், வேளாண்மைத் துறை அமைச்சர் எம்.ஆர்.கே. பன்னீர்செல்வம், கைத்தறி மற்றும் துணிநூல் துறை அமைச்சர் ஆர். காந்தி, மாவட்டச் செயலர் க. சுந்தர், சட்டமன்ற உறுப்பினர் சி.வி.எம்பி. எழிலரசன், மாவட்ட வருவாய் அலுவலர் செ. வெங்கடேஷ், மாநகராட்சி மேயர் எம். மகாலட்சுமி, இளைஞரணி அமைப்பாளர் அ. யுவராஜ், மாநகரச் செயலர் சி.கே.வி. தமிழ்செல்வன் உள்பட பலர் பங்கேற்றனர்.
