அடித்து ஆடும் அன்புமணி… அடுத்து ராமதாஸ் எதை செய்யப்போகிறார்?
‘கட்சியின் பெயர், சின்னம் எங்களுக்கே சொந்தம். நிர்வாகிகள் 90 சதவீதம் எங்கள் பக்கம் இருக்கிறார்கள்’ என உற்சாகமாக பேசத் தொடங்கியுள்ளது அன்புமணி அணியினர். அடுத்து எந்த நடவடிக்கையை ராமதாஸ் எடுக்கிறார் என்பது கேள்வியாக உள்ளது.
பாமகவில் தினந்தோறும் பரபரப்பு குறையவில்லை. தந்தை – மகன் இடையிலான பிளவு, கட்சியை தொடர்ந்து தலைப்புச் செய்தியாக்குகிறது. சமீபத்திய தகவலாக, பாமக சட்டப்பேரவை குழு தலைவராக இருந்த ஜி.கே.மணியை நீக்கி, வெங்கடேஸ்வரனை அன்புமணி தரப்பு நியமித்துள்ளது.
1997 முதல் 2022 வரை பாமக தலைவராக இருந்த ஜி.கே.மணி, கட்சியின் பல்வேறு சவால்களிலும் துணிந்து பயணித்தவர். அவரையே அன்புமணி பலமுறை ‘தியாகச் செம்மல்’ எனக் கூறியுள்ளார். ஆனால் தற்போது அவரை பொறுப்பிலிருந்து விலக்கிவிட்டது. அதேபோல், ராமதாஸ் பக்கம் இருக்கும் எம்எல்ஏ அருளை கட்சியிலிருந்து நீக்கவும் தீர்மானித்துள்ளனர்.
இதனால், பாமகவின் 5 எம்எல்ஏக்களில் 4 பேர் மட்டுமே இப்போது உள்ளனர். அதில் 3 பேர் அன்புமணி தரப்போடு இருப்பதாகவும், அவர்களுக்கு சட்டப்பேரவை குழு தலைவர், துணைத் தலைவர், கொறடா பதவிகள் வழங்கப்பட்டதாகவும் தெரிவிக்கப்பட்டுள்ளது. சபாநாயகர் இதை அங்கீகரித்தால், சட்டப்பேரவையில் அன்புமணி தரப்பே அதிகாரப்பூர்வ கட்சியாகக் கருதப்படும்.
மேலும், கட்சியின் பெயரும், சின்னமும் தேர்தல் ஆணையத்திடம் அன்புமணி தரப்புக்கு ஒதுக்கப்பட்டால், அது ராமதாஸ் அணிக்கு பெரும் பின்னடைவாக மாறும். எனவே, ராமதாஸ் தரப்பும் தேர்தல் ஆணையத்தில் தாங்களே நிறுவனர் என்பதால், கட்சி உரிமை தங்களுக்கே என வாதம் வைத்து வருகின்றனர். ஆனால், டெல்லி அரசியல் ஆதரவு பல சமயங்களில் எவ்வாறு தீர்மானங்களை மாற்றியமைத்துள்ளது என்பது முன்பு பார்த்ததே.
சரத்பவார் – அஜித் பவார் விவகாரம் இதற்கு உதாரணம். பெரும்பான்மையைக் கொண்ட எம்எல்ஏ, எம்பிக்கள் அஜித் பவார் பக்கம் இருந்ததால், நிறுவனர் சரத்பவாரே புதிய கட்சிக்கு மாற வேண்டிய சூழல் ஏற்பட்டது. இதையே நினைவுகூர்கிறார்கள் அரசியல் விமர்சகர்கள்.
ராமதாஸ் தரப்பு, சட்டரீதியாக பாமகவின் உரிமை தங்களுக்கே வரும் என்று நம்புகிறது. ஆனால், அன்புமணி தேசிய ஜனநாயக கூட்டணியோடு இணைய அதிக வாய்ப்பு இருப்பதால், டெல்லியின் ஆதரவு அவருக்கே கிடைக்கும் என மதிப்பிடப்படுகிறது.
இதனால், தனது ஆரம்பப் புள்ளியான வன்னியர் சங்க அரசியலை மீண்டும் கையில் எடுத்திருக்கிறார் ராமதாஸ். பாமகவின் பெயரும் சின்னமும் அன்புமணி கைக்கு சென்றுவிட்டால், வன்னியர் சங்க அடையாளத்துடன் புதிய கட்சியை துவக்கவும் அவர் திட்டமிட்டுள்ளார் எனக் கூறப்படுகிறது. இதற்கான வெளிப்பாடாக, டிசம்பரில் பெரிய அளவில் வன்னியர் இடஒதுக்கீடு போராட்டத்தை நடத்துவதாக அறிவித்துள்ளார். இந்த போராட்டத்தில் பெரும்பான்மை இளைஞர்களை திரட்டி தன் வலிமையை காட்ட ராமதாஸ் தயாராகியுள்ளார்.
வட மாவட்டங்களில் இது தாக்கத்தை ஏற்படுத்தினால், அன்புமணிக்கு சவாலாக மாறும். தற்போதைய சூழலில், தந்தை-மகன் இடையே விரைவில் சமரசம் ஏற்பட வாய்ப்பில்லை என்பதே விமர்சகர்களின் கருத்து. ஒருவேளை இருவரும் தனித்தனி கட்சிகளாக, தனித்தனி சின்னங்களில் தேர்தலில் போட்டியிட்டால், வட மாவட்டங்களில் கடுமையான போட்டி நிலவும்.
அன்புமணி அணியினர் அதிமுக-பாஜக கூட்டணியில் இணையப்போகிறார்கள் என்பது தெளிவாக உள்ளது. அதே சமயம், ராமதாஸ் தரப்பு திமுகவோ அல்லது வேறு அணியோ இணையும் வாய்ப்பு உள்ளது. தேர்தல் முடிவுகள் தான் பாமகவின் அடுத்த கட்ட நகர்வுகளை தீர்மானிக்கும்.
‘எதற்கும் தயாராக இருக்கிறேன்’ என்று ராமதாஸ் வெளிப்படையாகச் சொல்கிறார். மறுபக்கம், அன்புமணியும் அதே அளவு தயார் நிலையில் உள்ளார். இந்த மோதலில் யாரின் கை மேல் போகிறது என்பதை அரசியல் வட்டாரங்கள் ஆவலுடன் காத்திருக்கின்றன.
