புதைமின் வடங்கள் சேதமடைவதை தடுக்க சாலை தோண்டும் பணியை மின் வாரியம் மேற்கொள்ள திட்டம்

சென்னை மாநகரில் புதைமின் வடங்கள் அடிக்கடி சேதமடைவதை தடுக்கும் நோக்கில், இனி மாநகராட்சி மற்றும் குடிநீர் வாரியம் போன்ற துறைகளுக்கான சாலை தோண்டும் பணிகளை மின் வாரியமே நேரடியாக மேற்கொள்ளும் திட்டம் அறிவிக்கப்பட்டுள்ளது.

மின்வாரிய அதிகாரிகள் தெரிவித்ததாவது:

நுகர்வோருக்கு மின்சாரம் விநியோகிக்கும் விதமாக, கிராமப்புற மற்றும் புறநகர் பகுதிகளில் உயரமான கம்பங்களில் மின் கம்பிகள் பொருத்தப்பட்டுள்ளன. ஆனால், நகரப் பகுதிகளில் நெரிசல் அதிகம், உயரமான கட்டிடங்கள் நிறைந்துள்ளதால் பாதுகாப்பை கருத்தில் கொண்டு நிலத்தடி புதைவட மின் கம்பிகள் பொருத்தப்பட்டுள்ளன.

குறிப்பாக, சென்னை மாநகரின் பெரும்பாலான இடங்களில் இவ்வகை புதைமின் வடங்களின் மூலம் மின்சாரம் விநியோகிக்கப்படுகிறது. ஆனால், மாநகராட்சி, குடிநீர் வாரியம் போன்ற துறைகள் சாலை தோண்டும் போது, இவ்வடங்கள் சேதமடைகின்றன.

சேதமடைந்த மின்வடங்கள் உடனடியாக பழுது பார்த்து சரிசெய்யப்படாமல் விட்டு விடப்படுவதால், குறிப்பாக மழைக்காலங்களில் மின்சாரம் பாயும் விபத்துகள் ஏற்படுகின்றன. சமீபத்தில் கண்ணகி நகரில் தூய்மைப் பணியாளர் ஒருவர் மின்சாரம் தாக்கி உயிரிழந்த சம்பவம் அதற்கு சான்றாகும்.

இதையடுத்து, சேதமடைந்த புதைமின் வடங்களை கணக்கெடுக்கும் சிறப்பு குழுக்கள் அமைக்கப்பட்டன. கடந்த இரண்டு வாரங்களில் மேற்கொண்ட ஆய்வில்,

• 700-க்கும் மேற்பட்ட புதைமின் வடங்கள் சேதமடைந்துள்ளன.
• 1,500-க்கும் மேற்பட்ட மின் உபகரணங்கள் பழுதடைந்த நிலையில் உள்ளன.
• மொத்தம் 3,000-க்கும் மேற்பட்ட இடங்களில் மின் விபத்து அபாயம் இருப்பது கண்டறியப்பட்டுள்ளது.

இவற்றில், பெரும்பாலானவை ஏற்கனவே சரிசெய்யப்பட்டுள்ளன. மீதமுள்ளவை அடுத்த ஒரு வாரத்தில் சரிசெய்யப்படும் என்றும், மின்விபத்தால் உயிரிழப்புகள் முற்றிலும் தடுக்கப்படும் என அதிகாரிகள் தெரிவித்தனர்.

மேலும், தற்போது சாலை தோண்டும் பணிக்கு முன், மாநகராட்சி மற்றும் குடிநீர் வாரியம், மின் வாரியத்திடம் தகவல் தெரிவிக்க வேண்டும் என்ற நடைமுறை இருந்தாலும், செயல்முறைகள் சரியாக பின்பற்றப்படாததால் அடிக்கடி சேதங்கள் ஏற்படுகின்றன.

ஆகவே, இனிமேல் சாலை தோண்டும் பணிகளையே மின் வாரியம் நேரடியாக மேற்கொள்ளும் திட்டம் வகுக்கப்பட்டுள்ளது. அந்த பணிகளுக்கான செலவினை, சாலை தோண்டும் துறை (மாநகராட்சி/குடிநீர் வாரியம்/உள்ளாட்சி அமைப்புகள்) மின் வாரியத்திற்கு வழங்க வேண்டும். இதுகுறித்து பிற துறைகளுடன் ஆலோசனை நடத்தப்படவுள்ளதாகவும், விரைவில் நடைமுறைக்கு வரும் என்றும் அதிகாரிகள் தெரிவித்தனர்.