தீபாவளி பண்டிகையை முன்னிட்டு 108 சிறப்பு ரயில்கள்: தெற்கு ரயில்வே அறிவிப்பு

தீபாவளி பண்டிகையை முன்னிட்டு தெற்கு ரயில்வே சார்பில் மொத்தம் 108 சிறப்பு ரயில்கள் இயக்கப்படவுள்ளதாக அதிகாரிகள் தெரிவித்தனர்.

சென்னை கோட்டம் சார்பில், மகாத்மா காந்தியின் 156-வது பிறந்தநாள் மற்றும் தூய்மை சேவை பிரச்சார நிறைவு விழா நேற்று சென்னை சென்ட்ரல் ரயில் நிலையத்தில் நடைபெற்றது. இதில் தெற்கு ரயில்வே கூடுதல் பொது மேலாளர் பி. மகேஷ் சிறப்பு விருந்தினராக பங்கேற்றார். அவருடன் கோட்ட மேலாளர் சைலேந்திர சிங், கூடுதல் கோட்ட மேலாளர்கள் தேஜ் பிரதாப் சிங், அங்கூர் சவுகான் உள்ளிட்ட அதிகாரிகள், ஊழியர்கள் கலந்துகொண்டனர்.

விழாவில், ரயில்களில் பயணம் செய்யும்போது பின்பற்ற வேண்டிய பாதுகாப்பு நடவடிக்கைகள் குறித்து நாடகங்கள், பாடல்கள் மூலம் விழிப்புணர்வு ஏற்படுத்தப்பட்டது.

பின்னர் செய்தியாளர்களிடம் பேசுகையில், கூடுதல் பொது மேலாளர் பி. மகேஷ், கோட்ட மேலாளர் சைலேந்திர சிங் ஆகியோர் கூறியதாவது:

தூய்மை பணிகள்: ரயில் நிலையங்களில் தூய்மைப் பணிகள் மூன்று கட்டங்களாக மேற்கொள்ளப்பட்டன.

• ஆகஸ்ட் 1 முதல் 15 வரை முதல் கட்டம்,
• ஆகஸ்ட் 16 முதல் செப்டம்பர் 16 வரை இரண்டாம் கட்டம்,
• செப்டம்பர் 17 முதல் அக்டோபர் 2 வரை மூன்றாம் கட்டம்.

இந்த பணிகளில் மொத்தம் 28,000 தன்னார்வலர்கள் பங்கேற்றனர்.

அவர்கள் மேலும் தெரிவித்ததாவது: தீபாவளி பண்டிகையை முன்னிட்டு தெற்கு ரயில்வே மொத்தம் 108 சிறப்பு ரயில்களை இயக்குகிறது. இதில் 50% ரயில்கள் தமிழகத்துக்குள் (தென்மாவட்டம் உட்பட) இயக்கப்படுகின்றன; மீதமுள்ள 50% ரயில்கள் பிற மாநிலங்களுக்கு செல்கின்றன. இயக்கப்படும் திகதி தொடர்பான அறிவிப்பு விரைவில் வெளியிடப்படும்.