“பயப்படுறீங்க… சரி இருக்கட்டும்!” – கரூர் விவகாரம் குறித்து ஸ்டாலினுக்கு பழனிசாமி கடும் பதில்
கரூர் சம்பவம் தொடர்பாக முதல்வர் ஸ்டாலின் கூறிய விமர்சனங்களுக்கு பதிலளித்த அதிமுக பொதுச் செயலாளர் எடப்பாடி பழனிசாமி, “கரூருக்கு நீங்கள் விரைந்து சென்றீர்கள், ஆனால் கள்ளக்குறிச்சிக்கு ஏன் செல்லவில்லை? வேங்கைவயலுக்கு ஏன் செல்லவில்லை? ஏர் ஷோவில் உயிரிழந்தவர்களின் வீடுகளுக்கு ஏன் செல்லவில்லை? அப்போது செய்தது அரசியல் இல்லையா?” என்று கேள்வி எழுப்பியுள்ளார்.
முன்னதாக ராமநாதபுரத்தில் பேசிய முதல்வர் ஸ்டாலின், “கரூர் பிரச்சினையை வைத்து பாஜக அரசியல் ஆதாயம் தேடுகிறது; அதேபோல பழனிசாமி ஊர் ஊராகச் சென்று கூட்டணி கூட்டாளிகளைத் தேடிக்கொண்டிருக்கிறார்” என்று விமர்சித்திருந்தார்.
இதற்கு எதிராக தனது எக்ஸ் பக்கத்தில் பதிவிட்ட பழனிசாமி,
“தமிழக முதல்வர், பேசுவதற்கு முன் கண்ணாடியில் உங்களைப் பார்த்திருக்கலாம். நீங்கள் எழுப்பும் கேள்விகளுக்கே, உங்களே பதில் சொல்ல வேண்டியது. கச்சத்தீவு விவகாரத்தில் உங்களுக்கு என்ன தகுதி இருக்கிறது? நாடாளுமன்றத்தில் 39 எம்.பி.க்கள் இருந்தும் குரல் எழுப்பாமல், இப்போது நீலிக்கண்ணீர் வடிப்பது மக்களை ஏமாற்ற முடியாது.
கச்சத்தீவை விட்டுக் கொடுத்தது உங்கள் தந்தை கருணாநிதி. அப்போது ஆட்சியில் இருந்தது இன்று நீங்கள் கூட்டணியில் இணைந்திருக்கும் காங்கிரஸ் கட்சியே. உண்மையில் சண்டை போடவேண்டும் என்றால், உங்கள் கூட்டணிக்குள்ளேயே போடுங்கள்.
கரூர் துயரத்தின் போது யார் வந்தார்கள், யார் வரவில்லை என்பதைக் கேட்கும் முன், கள்ளக்குறிச்சியில் நடந்ததற்கு ஏன் செல்லவில்லை? வேங்கைவயலில் நடந்த துயரத்துக்கு ஏன் செல்லவில்லை? ஏர் ஷோ உயிரிழப்புகளுக்கு ஏன் வரவில்லை? அப்போதெல்லாம் அரசியல் செய்யவில்லையா?” எனக் கேட்டுள்ளார்.
மேலும், “ஆட்சித் திறனில் தோல்வி, நிதி நிர்வாகத்தில் தோல்வி, சட்ட ஒழுங்கில் தோல்வி, பெண்கள் பாதுகாப்பில் தோல்வி, போதைப்பொருள் கட்டுப்பாட்டில் தோல்வி, விலைவாசி உயர்வை அடக்குவதில் தோல்வி என, மக்களை வாட்டும் திமுக ஆட்சியை மாற்ற வேண்டும் என்பதே எங்கள் கூட்டணியின் அடிப்படை நோக்கம்.
உங்கள் ஆட்சியை வீடு திருப்புவதால் மக்களின் நலனும், மாணவர்களின் எதிர்காலமும், பெண்களின் பாதுகாப்பும் உறுதிசெய்யப்படும். மக்கள் நலனுக்காகத்தான் நாங்கள் இருக்கிறோம்; கூட்டணிக்காக அல்ல. நான் எப்போதும் மக்களோடு இருப்பவனாகவே இருக்கிறேன். அதை நீங்கள் ஏற்றுக் கொண்டுள்ளீர்கள், அதற்கு நன்றி.
ஆட்சியின் தவறுகளைச் சுட்டிக்காட்டினால் கூட, அதை அரசியல் எனப் பார்க்கிறீர்கள். சரி… பயப்படுறீங்க… இருக்கட்டும்” என பழனிசாமி பதிவு செய்துள்ளார்.
