வானிலை முன்னறிவிப்பு: திருச்சி, மதுரை, சேலம் உட்பட 12 மாவட்டங்களில் கனமழை சாத்தியம்

தமிழகத்தின் திருச்சி, மதுரை, சேலம் உள்ளிட்ட 12 மாவட்டங்களில் நாளை கனமழை பெய்யக்கூடும் என்று சென்னை வானிலை ஆய்வு மையம் அறிவித்துள்ளது.

அதன் செய்திக் குறிப்பில், வடகிழக்கு அரபிக்கடல் பகுதியில் ‘சக்தி’ என்ற தீவிர புயல் உருவாகியுள்ளது. இது நாளை வடகிழக்கு திசையில் நகர்ந்து, படிப்படியாக பலவீனப்பட வாய்ப்புள்ளதாக கூறப்பட்டுள்ளது.

மேலும், தென்னிந்தியாவின் மேல் வளிமண்டல கீழடுக்கு சுழற்சி காணப்படுகிறது. இதன் தாக்கத்தால் தமிழகத்தில் நாளை (அக்டோபர் 5) பல இடங்களில், மேலும் 6 முதல் 10ம் தேதி வரை சில இடங்களில் இடியுடன் கூடிய லேசானது முதல் மிதமான மழை பெய்ய வாய்ப்பு உள்ளது என தெரிவிக்கப்பட்டுள்ளது.

நாளைய கனமழை சாத்தியம் உள்ள மாவட்டங்கள்:

கிருஷ்ணகிரி, தருமபுரி, சேலம், திருப்பத்தூர், நாமக்கல், திருச்சி, திண்டுக்கல், மதுரை, தேனி, விருதுநகர், சிவகங்கை மற்றும் ராமநாதபுரம்.

சென்னை மற்றும் புறநகர் பகுதிகளில் நாளை வானம் மேகமூட்டத்துடன் காணப்படும். நகரின் சில பகுதிகளில் இடியுடன் கூடிய லேசானது முதல் மிதமான மழை பெய்ய வாய்ப்பு உள்ளது.

கடந்த 24 மணி நேர மழைப் பதிவுகள் (இன்று காலை 8.30 மணி வரை):

• கிருஷ்ணகிரி மாவட்டம் ஓசூர் – 12 செ.மீ
• திண்டுக்கல் – 11 செ.மீ
• விழுப்புரம் மாவட்டம் அவலூர்பேட்டை, செம்மேடு, திருவண்ணாமலை மாவட்டம் கீழ்பென்னாத்தூர் – தலா 10 செ.மீ
• விழுப்புரம் மாவட்டம் முண்டியம்பாக்கம், தருமபுரி – தலா 9 செ.மீ
• கள்ளக்குறிச்சி மாவட்டம் மூங்கில்துறைப்பட்டு, திருவண்ணாமலை மாவட்டம் செங்கம், ஆரணி, மதுரை மாவட்டம் புலிப்பட்டி – தலா 8 செ.மீ