கரூர் தவெக பிரச்சாரத்தில் ஆம்புலன்ஸ் ஓட்டுநர் மீது தாக்குதல்: சேலம் கிழக்கு மாவட்ட செயலாளர் கைது
கரூர் வேலுசாமிபுரம் பகுதியில் நடைபெற்ற தவெக பிரச்சார கூட்டத்தின் போது ஆம்புலன்ஸ் ஓட்டுநரை தாக்கிய வழக்கில், தவெக சேலம் கிழக்கு மாவட்ட செயலாளர் கைது செய்யப்பட்டுள்ளார்.
செப்டம்பர் 27ஆம் தேதி கரூரில் நடைபெற்ற தவெக பிரச்சார கூட்டத்தில் ஏற்பட்ட பெரும் நெரிசலில் 41 பேர் உயிரிழந்தனர்; 100க்கும் மேற்பட்டோர் காயமடைந்தனர். நெரிசலில் சிக்கியவர்களை மீட்க ஆம்புலன்ஸ்கள் கூட்டத்துக்குள் அனுமதிக்கப்பட்டன. அப்போது, ஆம்புலன்ஸ் ஓட்டுநர் அடையாளம் தெரியாத சில நபர்களால் தாக்கப்பட்டதாக புகார் அளித்தார்.
இந்த புகாரின் அடிப்படையில், கரூர் நகர போலீஸார் 10க்கும் மேற்பட்ட அடையாளம் தெரியாத நபர்களை எதிர்த்து வழக்கு பதிவு செய்து, சிசிடிவி காட்சிகளை வைத்து விசாரணை தொடங்கினர். விசாரணையின் போது, ஆம்புலன்ஸ் முன் காரை நிறுத்தியதாக கருதப்பட்ட வாகனம் பறிமுதல் செய்யப்பட்டது. அந்தக் காரின் உரிமையாளரும் ஓட்டுநருமான சேலத்தைச் சேர்ந்த எஸ்.ஆர். மணிகண்டன் நீதிமன்றத்தில் சரணடைந்தார்.
கரூர் ஜூடிஷியல் மாஜிஸ்ட்ரேட் எஸ்.பி. பரத்குமார் முன்னிலையில் ஜாமீன் மனு தாக்கல் செய்யப்பட்டு, ஜாமீன் வழங்கப்பட்டது.
இந்நிலையில், ஆம்புலன்ஸ் ஓட்டுநரை தாக்கியதாக குற்றச்சாட்டில் தவெக சேலம் கிழக்கு மாவட்ட செயலாளர் வெங்கடேஷ் (வயது 40) என்பவரை கரூர் நகர போலீஸார் சேலத்தில் கைது செய்து, மேலதிக விசாரணைக்காக கரூருக்கு அழைத்துவந்துள்ளனர்.
