திமுகவுக்கு தேர்தலிலும் தோல்வியிலும் பயம் ஏற்பட்டுள்ளதால், அவர்கள் அர்த்தமில்லாத பேச்சுகளைச் செய்ய ஆரம்பித்துள்ளனர். கூட்டணி அரசியலோடு தொடர்புடைய விஷயங்கள் குறித்து அமித்ஷா மற்றும் அதிமுக பொதுச்செயலாளர் எடப்பாடி பழனிசாமி உரிய முடிவெடுப்பார்கள்,” என்று பாஜக மாநிலத் தலைவர் நயினார் நாகேந்திரன் தெரிவித்தார்.
திருநெல்வேலியில் செய்தியாளர்களைச் சந்தித்த அவர் கூறியதாவது:
“திமுக அரசு நடத்தியது உண்மையான முருகன் மாநாடு அல்ல. கடவுள் மீது நம்பிக்கை இல்லாதவர்கள், கடவுளை ஒரு கல்லாகவே எண்ணி அவமதிப்பவர்கள், வேறு மதங்களை இழிவுபடுத்த பேசுபவர்கள் நடத்தும் மாநாடு முருகன் தொடர்புடையதாக இருக்க முடியாது.
முற்றிலும் முருக பக்தர்கள் ஒன்றிணைந்த மாநாட்டை இந்து முன்னணி தான் ஏற்பாடு செய்தது. அந்த மாநாட்டில் நாங்கள் பங்கேற்றோம். எவரையும் விமர்சிக்கவோ, வேறு மதங்களை குறைகூறவோ இல்லை. ஓட்டுக்காக மக்கள் முன் தலைவணங்கவோ இல்லை.
இந்த நிகழ்வை தேர்தல் நோக்கில் பயன்படுத்த முயற்சி எங்களிடம் இல்லை. திருச்செந்தூரில் நடைபெறும் கும்பாபிஷேகம் அனைத்து பக்தர்களுக்கும் பொதுவானதாகும். அதைக் கொண்டு திமுக தான் ஆதாயம் பெற முயற்சி செய்கிறது. முதலமைச்சர் ஸ்டாலின் தலைமையிலான குடும்ப ஆட்சி இனி தொடராது; பொதுமக்கள் அதனை ஏற்கமாட்டார்கள். குறிப்பாக இளைஞர்கள், அடுத்த தலைமுறை, அவர்களை விரும்புவதில்லை,” என்றார் நயினார் நாகேந்திரன்.
