‘தமிழக அரசுப் பள்ளி மாணவர்கள் செய்த தவறு என்ன?’ – மாநிலக் கல்விக் கொள்கையைப் பற்றி எல்.முருகனின் 11 கேள்விகள்

திமுக அரசு கொண்டு வந்துள்ள மாநிலக் கல்விக் கொள்கை, ஸ்டிக்கர் ஒட்டும் விளம்பரப் போக்கின் தொடர்ச்சி மட்டுமே. நான் கேட்கும் இந்த கேள்விகளுக்கு முதல்வர் ஸ்டாலின் பதில் அளிக்கத் தயார் ஆவாரா?” என மத்திய இணையமைச்சர் எல்.முருகன் கேள்விகளைத் தந்துள்ளார்.

இதுகுறித்து அவர் வெளியிட்டுள்ள அறிக்கையில், “முதல்வர் மு.க.ஸ்டாலின் தினந்தோறும் முன்னெடுக்கும் விளம்பர அரசியலின் புதிய பாகம்தான் இந்த மாநிலக் கல்விக் கொள்கை. தமிழில் புதிய பெயர்களைக் கொடுத்து, மத்தியத் திட்டங்களுக்கு தங்கள் பெயரை ஒட்டி, காலத்தை இழுக்கும் திமுக அரசின் இன்னொரு வெளியீடாகவே இதைக் காணலாம்.

ஏற்கெனவே இருக்கும் விஷயங்களைச் சற்று மாற்றி, புதிய கோவையில் வெளியிடுவதையே நிர்வாக முறை என நம்பும் திமுக அரசு, அதையே மாநிலக் கல்விக் கொள்கை என்ற பெயரில் மீண்டும் வெளியிட்டுள்ளது. ஏற்கெனவே அமலிலிருக்கும் கல்விக் கொள்கையில் இருந்து என்ன வேறுபாடுகள் இதில் உள்ளன? 83 பக்கங்களாக வந்துள்ள இந்தக் கல்விக் கொள்கையை யாரும் புரிந்து விமர்சிக்க முடியாத வகையில் குழப்பமான தமிழில் தயாரித்துள்ளனர்.

ஆங்கிலத்திலிருந்து மொழிபெயர்த்துத் தமிழில் வெளியிட்ட இந்தக் கல்விக் கொள்கை மக்கள் புரியவில்லை என்றால், பள்ளிக்கல்வித் துறையைத் திமுக அரசு எவ்வளவு கவனிக்கிறது என்பதே வெளிப்படுகிறது. அரசு பள்ளிகளில் தமிழும் ஆங்கிலமும் மட்டுமே கற்பிக்கப்படும் இருமொழிக் கொள்கை அமல்படுத்தப்படும் என்கிறார்கள். அப்படி என்றால், தனியார் பள்ளிகளில் தேசியக் கல்விக் கொள்கை பரிந்துரைத்த மூன்றாவது மொழியை திமுக ஏற்றுக்கொள்கிறதா? அரசுப் பள்ளி மாணவர்கள் என்ன தவறு செய்தார்கள்? ஏன் அவர்களுக்கே இந்த வாய்ப்பு மறுக்கப்படுகிறது?

திமுகவினரின் கட்டுப்பாட்டில் உள்ள பள்ளிகளிலும், முதலமைச்சரின் குடும்பத்தினர் நடத்தும் பள்ளிகளிலும் மூன்று மொழிகளும் கற்பிக்கப்படலாம். ஆனால் அரசு பள்ளிகளில் படிக்கும் பின் தங்கியோர், ஒடுக்கப்பட்டோர், ஏழை மாணவர்களுக்கு அந்த வாய்ப்பு இல்லை. இதற்கே சமூக நீதி என அழைக்கலாமா?

இந்த சூழ்நிலையில்தான், பள்ளிகளில் சமூக நீதிக் கல்வி கற்பிக்கப்படும் என மாநிலக் கல்விக் கொள்கையில் அறிவிக்கப்பட்டுள்ளது. திமுகவில் உண்மையான சமூக நீதி உள்ளதா? தந்தைக்குப் பிறகு மகன் என்ற கொள்கையை பின்பற்றும் திமுகவினர், சமூக நீதி பற்றி மக்களுக்கு கற்பிக்கப்போவதாக சொல்கிறார்கள்.

தமிழகத்தின் பழமையான மொழி, பண்பாடு, மரபுகளை அழித்ததுதான் திமுகவின் வரலாறு. இவர்கள் சமூக நீதியைப் பற்றி பேசுவதற்கே தகுதி இல்லை. தாய்மொழியில் கல்வி வழங்கப்படும் என இந்தக் கொள்கையில் தெரிவிக்கப்படுகிறது. ஆனால், தமிழகத்தில் காமராஜரின் காலம் முதல் தாய்மொழி வழிக் கல்வியே இருந்து வருகிறது. தேசியக் கல்விக் கொள்கை இதையே வலியுறுத்துகிறது.

இதை திமுகவினர் ஒரு புதுமை போல வெளியிடுவது ஏற்கெனவே உள்ள முறையை சற்று மாற்றி மீண்டும் அறிவிப்பதே. தமிழ் கலாசாரம், மரபு தொடர்பான பாடங்கள் சேர்க்கப்படும் என அறிவிக்கப்பட்டுள்ளது என்பது வெறும் பேச்சு மட்டுமே. ராஜராஜ சோழர், ராஜேந்திர சோழர் குறித்து பிரதமர் மோடி பேசும் வரை திமுகவினருக்கு அவர்கள் வரலாறே தெரியவில்லை.

தமிழகத்தின் மாமன்னர்களை பாடநூல்களில் ஒதுக்குவது யார்? தங்கள் தந்தை கருணாநிதியின் சாதனைகளை மட்டும் பாடமாக்க நினைப்பதுதான் திமுகவின் நோக்கம். எனவே, முதல்வர் ஸ்டாலினிடம் நான் கீழ்கண்ட கேள்விகளை முன்வைக்கிறேன். அவரிடம் துணிந்தால் பதில் கூறட்டும்:

1. 10-ம் வகுப்பு மாணவர்களுக்கே தமிழெழுத்துகள் சரியாக வரவில்லை, ஏன்?
2. தமிழ்நாட்டு மாணவர்கள் தமிழில் எழுதவும் பேசவும் போராடுவது ஏன்?
3. எண்களை அடையாளம் காண இயலாமல் மாணவர்கள் திணறுவது ஏன்?
4. பள்ளிக் கட்டிடங்கள் இடிந்து விழும் நிலையில் இருப்பதன் காரணம் என்ன?
5. பள்ளிகளில் அடிப்படை வசதிகள் இல்லாமல் மாணவர்கள் அவதிப்படுவது ஏன்?
6. உள்கட்டமைப்பு மேம்பாட்டுக்காக ஒதுக்கப்பட்ட நிதி என்ன நிலை?
7. அரசு பள்ளிகளுக்கு தரமில்லை என ஏழை மக்கள் கூட தனியார் பள்ளிகளையே தேர்ந்தெடுக்கிறார்கள், ஏன்?
8. ஒவ்வொரு ஆண்டும் தனியார் பள்ளிகளில் மாணவர் சேர்க்கை அதிகரிப்பது ஏன்?
9. அரசு பள்ளிகளில் மாணவர் எண்ணிக்கை குறைந்து கொண்டே போவதற்குக் காரணம் என்ன?
10. பல பள்ளிகளில் ஆசிரியர்கள் இல்லாமல் மாணவர்களே வகுப்பெடுப்பது ஏன்?
11. அரசுப் பள்ளி மாணவர்கள் ஆய்வகப் பயிற்சி பெற தனியார் பள்ளிகளுக்கு செல்ல வேண்டுமா?

மத்திய அரசு கல்விக்கென வழங்கும் நிதியை பெற்று, அதனை தவறாக பயன்படுத்தும் திமுக அரசு, கல்வித்துறையை இப்படிப் பாதிக்கிறது. கல்வி உரிமைச் சட்டத்தின்படி, தனியார் பள்ளிகளில் படிக்கும் மாணவர்களுக்கான அரசுப் பங்களிப்பு நிதியை மாநில அரசு செலுத்தவில்லை. மத்திய அரசு தனது பங்கினை அளித்தும், மாநில அரசு செலுத்தவில்லை என்பதே ஊடகச் செய்திகள் மூலம் தெரிகிறது. இதை முதல்வர் ஸ்டாலின் அறிந்திருக்கிறாரா?

நான் எழுப்பிய இந்தக் கேள்விகளுக்கு முதலில் பதில் கூறட்டும். தமிழில் பெயர் வைப்பதாலேயே எந்தத் திட்டமும் மக்கள் நலனுக்கானதாக மாற முடியாது. தமிழில் அறிவித்து, மறுநாளே முடிவுறுத்தும் திமுக அரசின் விளம்பர அரசியலை, இந்தக் கல்விக் கொள்கை வெளியீடாக மக்கள் ஏற்க மாட்டார்கள்” என எல்.முருகன் தெரிவித்துள்ளார்.