சி.பி. ராதாகிருஷ்ணன் பாஜகவின் துணை குடியரசுத்தலைவர் வேட்பாளர் – குடும்பத்தினரின் மகிழ்ச்சி!
திருப்பூரைச் சேர்ந்த, தற்போது மகாராஷ்டிர மாநில ஆளுநராக உள்ள 68 வயதான சி.பி. ராதாகிருஷ்ணன், பாஜக சார்பில் துணை குடியரசுத் தலைவர் வேட்பாளராக அறிவிக்கப்பட்டுள்ளார்.
1957 அக்டோபர் 20-ஆம் தேதி திருப்பூரில் பிறந்த ராதாகிருஷ்ணன், கடந்த 40 ஆண்டுகளுக்கும் மேலாக பாஜகவுடன் இணைந்துள்ளார். 1998, 1999-ஆம் ஆண்டுகளில் கோவை மக்களவை தொகுதி எம்.பி. ஆகத் தேர்ந்தெடுக்கப்பட்டவர். 2004-2007 வரை தமிழ்நாடு பாஜகத் தலைவராகவும், 2020-2022-ம் ஆண்டு வரை கேரள பாஜக பொறுப்பாளராகவும் பணியாற்றியுள்ளார். 2023-ல் ஜார்க்கண்ட் ஆளுநராக நியமிக்கப்பட்ட அவர், 2024-ல் மகாராஷ்டிர மாநில ஆளுநராகப் பொறுப்பேற்றார்.
இந்த புதிய அறிவிப்பை முன்னிட்டு, அவரது தாய் ஜானகி அம்மாள் திருப்பூரில் உள்ள இல்லத்தில் இனிப்பு வழங்கி மகிழ்ச்சி கொண்டாடினார். பாஜகவினர் குடும்பத்தினரை சந்தித்து வாழ்த்து தெரிவித்தனர்.
ஜானகி அம்மாள் கூறுகையில்:
“என் மகன் இத்தகைய உயர்ந்த நிலைக்கு வந்தது கடவுளின் அருள். பிரதமர் மோடிக்கு நன்றிகள். முன்னாள் ஜனாதிபதி ராதாகிருஷ்ணன் பெயரை வைத்ததே, அவர் பெரிய பொறுப்பை ஏற்க வேண்டும் என்பதற்காகத்தான். இப்போது அது நிஜமாகியுள்ளது” என்றார்.
திருப்பூரைச் சேர்ந்த அரசியல்வாதிகள் கூறுகையில்:
“கொங்கு மண்டலத்தை வலுப்படுத்தும் வகையில் பாஜக இத்தீர்மானத்தை எடுத்துள்ளது. வரவிருக்கும் சட்டப்பேரவைத் தேர்தலில், இந்த அறிவிப்பு அந்த மண்டலத்தின் முக்கியத்துவத்தை வெளிப்படுத்துகிறது” என பாராட்டினர்.
